Situata e ngarkuar epidemiologjike në vend, mjekja: Qarkullojnë shumë viruse

Shqipëria është shumë pranë epidemisë së gripit, pasi rastet në popullatë janë shtuar më shumë sesa deklaroi Instituti i Shëndetit Publik (ISHP) disa ditë më parë.

Mjekja pediatre Sonila Brati dha për A2 CNN informacione mbi situatën epidemiologjike, ku theksoi se qarkullojnë shumë viruse nga Covid tek ai kinez.

“Jemi afër epidemisë ISHP ka deklaruar 19 mijë raste në një javë, do të jenë shumë më tepër në këto ditët e tjera. Këto temperatura anormale të janarit besoj se kanë shtuar virozat pothuajse në të gjithë popullatën. Nuk po bëjnë diferencë te fëmijët dhe të rriturit. Sasia e viruseve është shumë e lartë. Në periudhën e covid flisnim vetëm për covid dhe jo viroza, njerëzit ishin më të kujdesshëm, ndërsa tani transmetueshmëria dhe marrja e një virozë tani është shumë më e madhe. Edhe Covid qarkullon, covid është kthyer si virozë normale dhe komplikacionet nuk janë si ato që ishin para 4 viteve. Mbase mund të jetë në forma më të rënda. RSV, gripi A dhe B. Virusi kinez problematikat kryesore i kishte në mushkëri, po kështu ndodh edhe me gripin. mendoj që edhe mund të qarkullojë në vendin tonë, por nuk është për t’u shqetësuar”, tha mjekja.

Ajo thekson se të gjitha viruset kanë të njëjta simptoma por problematike ka qenë temperatura që ka arritur në vlerën 40. Mjekja Brati tregon sesi duhet të veprohet në këto raste.

“Duhet bërë kujdes me temperaturën ka qenë shqetësuese ka shkuar në vlerën 40. Duhet dhënia e antiperitikëve në kohën dhe sasinë e duhur, marrja e lëngjeve në sasi të konsiderueshme. Problematika më e madhe është te fëmijët e vegjël. Duhet të drejtohen te mjeku për të mos neglizhuar raste se mund të shkojmë në fatalitete e komplikacione të rënda. Kontakti me mjekun është shumë i rëndësishëm. Simptomat e viruseve janë të njëjta nuk bëjnë diferencë dhe është e vështirë të bësh diferencën”, u shpreh Brati në A2 CNN.

Sipas mjekes, viruset kanë prekur të gjitha grupmoshat dhe ajo apelon për kujdes të shtuar dhe masa për të ndërprerë zinxhirin e transmetimit.

“E mira është që të qëndrojnë në shtëpi 3-4 ditë dhe të mos kenë kontakte me të tjerë që të zbusin zinxhirin transmetues. Pas pandemisë prindërit drejtohen te mjeku, vijnë tek ne, por e para që duhet të bëjnë është të qëndrojnë në shtëpi me fëmijët dhe të mos i dërgojnë në çerdhe, kopshte e shkolla, për të zbutur zinxhirin transmetues”.

E njëjta situatë epidemiologjike sipas mjekes do të vijojë edhe gjatë muajit shkurt.

“Java e fundit të janarit do të mbyllet në këtë gjendje, por unë mendoj që edhe shkurti do të vijojë në këtë situatë”. /Telegrafi/