Si ta ndërtoni lidhjen mbi baza të shëndosha

Në jetën reale, lidhjet e dashurisë nuk zhvillohen si në filma. Faza fillestare mund të jetë e vështirë dhe është çelësi për vazhdimin e marrëdhënies.

Në mënyrë që faza e përmendur të funksionojë në rendin më të mirë të mundshëm, lexoni këshillat e mëposhtme:

Përqendrohuni në të tashmen, jo në të kaluarën

Është e natyrshme të bartni frikën dhe përvojat tuaja negative në një marrëdhënie të re. Sidoqoftë, ato mund t’ju parandalojnë të jeni të lumtur. Përqendrohuni në cilësitë që e bëjnë partnerin tuaj të ri të ndryshëm. Do të duhet të flisni për lidhjet e mëparshme, por mos u nxitoni. Përdorni takimet e para për t’u njohur me karakteristikat e partnerit.

Flisni për të ardhmen

Derisa nuk duhet të përqendroheni në të kaluarën, duhet, të paktën në një farë mase, të përqendroheni në të ardhmen. Sigurisht, nuk keni pse të pyesni menjëherë nëse partneri juaj dëshiron të ketë fëmijë, por sigurisht që nuk duhet të prisni një vit për të mësuar se nuk keni të njëjtat pikëpamje për familjen dhe martesën.

Mendoni nëse ju pëlqen vërtet partneri juaj

Ndonjëherë ne duam të jemi në një lidhje aq shumë saqë as nuk e kuptojmë se ideja na tërheq më shumë sesa partneri. Ju i injoroni problemet, sepse jeni të bindur se lidhja duhet të funksionojë.

Mos diskutoni gjëra të rëndësishme përmes mesazheve

Dërgimi i mesazheve është i pranueshëm nëse është një bisedë e qetë. Nëse doni të diskutoni për ndjenjat ose problemet, bëjeni gjithmonë personalisht. Mesazhet jo vetëm që mund të shkaktojnë siklet, por mund të ndodhin edhe keqkuptime.

Kaloni pak kohë ndaras

Një marrëdhënie e re do t’ju duket emocionuese dhe rutina juaj ka të ngjarë të ndryshojë. Mund t’i takoni miqtë më rrallë, sepse doni të kaloni më shumë kohë me partnerin tuaj. Sidoqoftë, nëse jeni vazhdimisht bashkë, mund të ndodhë mbingopje. Pavarësisht se çfarë, kujdesuni që të mos i humbni miqtë ose ta harroni veten duke pasur vëmendjen vetëm te partneri. /Telegrafi/