Si qëndron situata e luftimeve për momentin në Ukrainë

Derisa Rusia intensifikon sulmin e saj në pjesën lindore të Ukrainës, ushtria ukrainase pohoi se trupat ruse po bëjnë pak përparim, veçanërisht në rajonin e Donetskut.

“Shkalla e avancimit të njësive të armikut gjatë veprimeve ushtarake në drejtimin e Donjeckut është e ulët, për shkak të rraskapitjes fizike të personelit dhe gjendjes së ulët morale dhe psikologjike”, tha të shtunën Shtabi i Përgjithshëm i Forcave të Armatosura të Ukrainës, transmeton Telegrafi.

Aktiviteti ajror i Rusisë “mbetet i lartë” mbi Ukrainën lindore dhe ka kontribuar në “sukseset e fundit taktike” të Rusisë, por “ka dështuar të ketë një ndikim domethënës në konflikt”, tha të shtunën vlerësimi i fundit i inteligjencës nga ministria e mbrojtjes e Mbretërisë së Bashkuar.

Presidenti ukrainas Volodymyr Zelensky tha këtë javë se një e pesta e territorit të vendit është nën kontrollin rus, me Donbasin “pothuajse tërësisht të shkatërruar”.

Ky është statusi i betejave në të gjithë vendin, sipas ushtrisë ukrainase.

Lindja

Në zonën Bakhmut të rajonit të Donjeckut, forcat ruse u detyruan të tërhiqen pasi “pësuan rezultatet e dëmtimit të zjarrit nga njësitë ukrainase”.

Në zonën Sloviansk të Donjeckut, Rusia dështoi në “operacionet sulmuese” në dy zona dhe “pësoi humbje”, tha ushtria ukrainase. Rusia gjithashtu “krye granatime artilerie” në tre zona të tjera.

Ushtria ukrainase ka thënë se njësitë ruse janë duke u forcuar në afrimet drejt Slovianskut, ndërsa po përgatiten për sulme të reja ndaj qytetit. Qindra njerëz po ikin nga Sloviansk çdo ditë, derisa numrat e evakuimit pothuajse janë dyfishuar këtë javë, tha kreu i administratës ushtarake të qytetit, Vadym Lyakh, të shtunën. Aktualisht ka rreth 22,000 njerëz të mbetur në qytet, rreth një e pesta e popullsisë së paraluftës prej rreth 110 mijë vetave, sipas Lyakh.

Në total, Ukraina zmbrapsi nëntë sulme nga rusët në rajonin e Donbasit në 24 orët e fundit, tha ushtria.

Por Rusia “nuk i ka ndalur operacionet sulmuese” dhe “vazhdon të lansojë sulme raketore dhe ajrore në infrastrukturën ushtarake dhe civile”, thuhet në deklaratë.

Në rajonin e Luhanskut, katër persona u vranë dhe një person u plagos pas sulmeve ruse në gjashtë zona, thanë zyrtarët rajonalë. Në betejën për qytetin e Severodonetsk, luftimet në rrugë vazhdojnë dhe ka pasur “aksione sulmi në zonën industriale” të qytetit, i cili ende mbahet nga forcat ukrainase.

Ukraina tani kontrollon rreth gjysmën e Severodonetsk-ut pas rimarrjes së një pjese të tokës nga rusët, sipas Serhiy Hayday, kreu i administratës ushtarake të rajonit të Luhanskut.

Ministria e Mbrojtjes e Mbretërisë së Bashkuar tha të premten se pret që Rusia të marrë kontrollin e të gjithë rajonit të Luhanskut në Ukrainën lindore brenda dy javëve të ardhshme, sipas vlerësimit të saj të fundit të inteligjencës.

Verilindja

Në Sumy, rusët hodhën gjashtë raketa “ajër-tokë” të shtunën në mëngjes, dhe raketa u shkrepën nga një aeroplan rus gjatë natës, sipas Dmytro Zhyvytskyi, kreu i administratës ushtarake rajonale të Sumy-t. Shtëpitë u dëmtuan, por nuk pati viktima nga sulmet.

Në rajonin e Kharkiv, një person vdiq dhe tetë persona u plagosën pas bombardimeve në Balaklia, duke përfshirë një vajzë 11-vjeçare, thanë zyrtarët rajonalë. Deklarata ushtarake shtoi se “zjarri intensiv vazhdon” kundër pozicioneve të trupave ukrainase.

Jugu

Në Odesa, dy persona u plagosën pasi një raketë lundrimi e lansuar nga një aeroplan rus goditi një magazinë bujqësore të shtunën në mëngjes, tha Serhii Bratchuk, zëdhënës i administratës ushtarake të Odesës.

Më tej në lindje, qyteti i Mykolaiv u “qëllua me artileri të rëndë dhe me raketahedhës të shumtë” të shtunën në mëngjes. Askush nuk u lëndua, thanë zyrtarët rajonalë.

Në zonën e Kherson-it, situata mbetet “stabile e vështirë”, thanë zyrtarët rajonalë. Trupat ruse vazhduan të bombardojnë zonën e Novovorontsovka. Komunikimet telefonike dhe interneti mbeten të kufizuara për “shumicën dërrmuese” të popullsisë së rajonit dhe “ndihma urgjente humanitare” është e nevojshme në rrethet Kakhovka dhe Beryslav përgjatë lumit Dnipro, thuhet në deklaratë. /Telegrafi/