Shtohet prania e gjarpërinjve në Tetovë, Gostivar me rrethinë (Video)

Dy gjarpërinj ishin parë ditë më parë në fshatin Siniçan të Tetovës. Gjarpërinjtë rrezikuan jetën e një gruaje e cila erdhi për vizitë në vendlindje, meqë jeton në perëndim. Ajo sot nuk ishte në shtëpi, por ngjarjen për TV21 e rrëfeu kunati i saj Qerim Demiri. Ai dyshon se gjarpërinjtë erdhën nga fusha. Andaj, edhe ka nis të pastrojë përreth shtëpisë, për të shmang një skenar të njëjtë te familja.

“Gjarpërinjtë nusja e vëllait i ka gjetur qaty të varët. Nusja e ka hapur këtë kapak dhe ato kanë ardhur këtu për të pirrë ujë. Ajo e ka mbyllë edhe është larguar. E unë sot e kamë marrë një punëtorë që ta pastrojë rreth përqark“, thotë ai.

Të vetmit që iu përgjigjen njerëzve që kanë halle me gjarpërinjtë, janë zjarrfikësit. Shefi i këtij shërbimi në Tetovë, Uka Aliti tregon se javën e fundit kanë pasur dy intervenime. Dhe si për habi, zvarranikët ata u desh t’i nxjerrin nga veturat e qytetarëve.

Spitali Klinik në këtë komunë, thotë të jetë pajisur me serume kundër kafshimit të gjarprit. Doktor Fatmir Saliu, tërheq vërejtjen se ata që pësojnë nga gjarpri, të sillen urgjent në klinikë. Kjo meqë, siç thekson ai, se ka lloje të zvarranikëve që janë më helmues se të tjerët, dhe kafshimi i tyre mund të jetë vdekjeprurës, nëse nuk trajtohet me kohë.