Shpërthen Kastro Zizo: Mallkuar qofshin mjekët shqiptarë! (Video)

Kantautori Kastro Ziso, emri i vërtetë i të cilit është Klevis Bega, ka shpërthyar në tërbim dhe mërzi kundër mjekëve shqiptarë të QSUT-së, por dhe kundër gjithë sistemit mjekësor në shqipëri.

Ai u ka bërë vetëm një “urim” mjekëve dhe sistemit shëndetësorë: “Mallkuar qofshin mjekët dhe mallkuar qoftë i gjithë sistemi i shëndetësisë shqiptare! I zënçin hakat e nënës time dhe i të gjithë atyre grave dhe njerëzve që kanë vdekur për derman në këto spitale”!

Këto mallkime i ka bërë duke rrëfyer në studion e Arian Çanit në “Zonë e lirë”, humbjen e nënës pak ditë më parë nga një sëmundje e rëndë.

Sipas Kastros, faji në këtë pjesë është edhe i politikës dhe qeverive.

Ai ka thënë se, “ky sistem është i kalbur dhe i mallkuar. Të gjithë derrat një turi kanë, dhe siç hanë lëkurat e shalqinit mund të hanë aty për aty edhe foshnjën e tyre. Nuk bëjnë dallime”.

Sipas Kastros, mjekësia shqiptare ka dështuar, dhe çdo gjë tjetër është thjeshtë një reklamë.

Gjatë intervistës ai shfaqi shenja tensioni sa herë iu rikthye çështjes së mjekësisë shqiptare dhe gjendjes së saj reale.

Kastro foli për sakrificën e dhjetra të sëmurëve që përjetojnë gjatë kurimit në Onkologjikun e QSUT-së.

Kostot e shtrenjta të medikamenteve, si dhe pamundësia ekonomike e shumë shqiptarëve për t’u kuruar, sipas Kastros, është një ferr i vërtetë dhimbjeje dhe mungesë shprese.

Ndërsa, nuk munguan edhe mallkime nga ana e tij për gjëndjen dhe situatën që këta persona përgjegjës e kanë shndërruar mjekësinë shqiptare.

Më tej këngëtari ka treguar edhe aspekte nga jeta e tij me nënën.

“Shumë herë kam gabuar. Pata përshtypjen sikur kisha gabuar në cdo gjë kur ajo ishte në ditët e fundit. Unë kam gabuar shumë dhe ajo më ka mbështetur gjithmonë”- tha ai.

Ai tregoi se nëna e tij u nda nga jeta parakohe në moshën 58-vjeçare nga një sëmundje e keqe.

“Isha përgatitur pasi e dija lajmin për sëmundjen e saj, por nuk ka përgatitje për humbjen e nënës. Njeriu është i prirur të mos e afrojë vdekjen. Unë nuk kam besuar kurrë në ferr apo parajsë, por kur të vdes nëna beson vetëm në parajsë”,- tha Kastro i përlotur.

Kastro tha se tashmë jeta e tij ka ndryshuar shumë.

“Jeta tani më ka ndryshuar shumë. Përveç dhimbjes, por kam ndryshuar sepse humbja e nënës qenka shumë e rëndë”- tha ai.

Deklarata e Kastro Zizos për emisionin Zonë e Lirë me të drejtë mund të konsiderohet një nga apoteozat më të mëdha për shpëtim dhe solidaritet me qindra familje shqiptare që përballen çdo ditë me këtë vuajtje.

https://youtu.be/fygz8svBJQo