Shoqata e Gastronomëve: Nuk pranojmë mbylljen pa kompensim financiar, duam takim me ministrin Murati

Kryetari i Shoqatës së Gastronomëve, Petrit Kllokoqi ka reaguar pas lajmeve se vendi pritet të mbyllet për shkak të përkeqësimit të gjendjes nga COVID-19.

Përmes një shkrimi në Facebook, tha se gastronomët nuk do ta pranojnë asnjë masë, pa u takuar me ministrin e Financave, Hekuran Murati.

“Situata është rënduar me Covid, ne nuk ngutemi si odat tjera me dhanë lajme, na shikojm zgjidhje për situatën. Situata është rënduar, personalisht dje e kryva virusin e në shpi kom të infektum. Spitalet kanë kollapsu, e duhet bashkarisht të dalim nga kjo situatë që po përkeqësohet përditë. Nuk osht zgjidhje me i mbyll bizneset , zgjidhje osht me dal me plan financiar si mujna mi kompenzu kto dame ekonomike që do të shkaktohen”, tha Kllokoqi.

Sipas tij mirë është të mbyllen të gjitha e të subvencionohen, se sa të punojnë pa mbështetje financiare.

“Shoqata e Gastronomëve asni masë nuk e pranon pa e takuar Hekuran Muratin për të diskutu mbështetjen financiare të gastronomisë! Shoqata e gastronomve ka inkuraju vaksinimin, ka bërë fushatë të vaksinimit dhe ka bërë obligim për anëtaret e saj që të vaksinohen të gjithë! Andaj, e lusim Qeverinë që të funksinojë si trung e jo si degë. Jemi të kuptueshëm ndaj situatës, mirëpo duhet kompenzim” u shpreh Kllokoqi.

Ndër të tjera ai tha më mirë është të hapen qendra vaksinimi se sa të ashpërsohen masat.

“Terminet për vaksinim po vonohen, ma mirë me hap qendra vaksinimi se sa ashpërsim të masave! Një Gjilponë në krahun tonë, një jetë e shpëtume! VAKSINOHU! VAKSINOHU! VAKSINOHU!!”, shkroi Kllokoqi.

Më herët ka reaguar edhe Oda e Hotelerisë dhe Turizmit./Telegrafi.