Shkolla “Gjin Gazulli” do të transformohet në Qendër të Kompetencës

Me qëllim të përkrahjes së shkollës së mesme profesionale elektroteknike “Gjin Gazulli”, kryetari Shpend Ahmeti nënshkroi Memorandum të Mirëkuptimit lidhur me ‘Projektin KSV/020 për Arsimin dhe Aftësimin Profesional (AAP)’, që mbështetet nga ‘Luxembourg Aid & Development’, e zbatohet nga ‘Lux Development’ dhe Ministria e Arsimit, Shkencës dhe Teknologjisë.

Shuma e përgjithshme e projektit është 5 milionë euro, dhe aktivitetet kryesore përfshinë: ndryshimet në kornizën ligjore dhe strukturën qeverisëse të sektorit AAP-së, avancimi i institucioneve të AAP-së, ndërlidhja me kurrikulën e ofruar, zhvillimi, përmirësimi dhe ndërlidhja e sistemeve të informacionit, duke përfshirë edhe ato që dedikohen për sektorin e udhëzimit në karrierë.

Transformimi i shkollës “Gjin Gazulli” në Qendër të Kompetencës (QK), është një prej pjesëve të rëndësishme të këtij projekti, për çka është paraparë që: të rinovohet objekti; të ketë pajisjet e nevojshme që për sektorin TIK dhe profilet që zhvillohen në QK; të zhvillohen kualifikimet e reja në QK për TIK, duke përfshire standardet e profesionit dhe kurrikulën e bazuar në kompetenca dhe materiale mësimore.

Po ashtu parashihet të ketë asistencë financiare dhe teknike për përzgjedhjen dhe zhvillimin e kapaciteteve të stafit administrativ dhe mësimdhënësve; të mblidhen informata mbi tregun e punës; të zhvillohet një model i qëndrueshëm afatmesëm dhe afatgjatë i biznesit; të bëhet bashkëpunimi me industrinë, me shërbimet për këshillim në karrierë, e të ngjashme; të zhvillohet strategjia dhe plani i qëndrueshëm financiar; si dhe të zhvillohen brenda shkollës të gjitha proceset që kanë të bëjnë me akreditimin e standardeve të profesionit dhe kualifikimit. /Telegrafi/