Shfaqen pamjet e Papa Leo XIII – paraardhësit me të njëjtin emër papnor si Papa Leo XIV

Papa aktual është Leo XIV, një figurë që ka sjellë një frymë të re në Kishën Katolike dhe që ndjek traditën e papëve të mëparshëm, duke i dhënë rëndësi çështjeve sociale, paqes dhe përkushtimit shpirtëror.

Megjithatë, për ta kuptuar më mirë trashëgiminë papnore që ai po ndjek, është me interes të veçantë të ndalemi te një nga paraardhësit e tij më të rëndësishëm: Papa Leo XIII.

Lexo po ashtu Jeta me plotë sfida - Papa Leo XIV

Ky film historik i rrallë na sjell pamje të Papës Leo XIII, i cili shërbeu si Papë nga viti 1878 deri në vitin 1903. Ai ishte një nga figurat më të rëndësishme të Kishës Katolike në shekullin XIX dhe njihet gjerësisht për përpjekjet e tij për t’i përshtatur mësimet e kishës me sfidat e epokës moderne, veçanërisht përmes enciklikës së tij të famshme Rerum Novarum, që mbrojti të drejtat e punëtorëve dhe hodhi bazat e doktrinës shoqërore të kishës.

The current Pope is Leo XIV.

This film shows his predecessor, Leo XIII.

Leo XIII, Pope from 1878 to 1903, is believed to be the earliest-born person ever captured on film.

He was born on March 2, 1810, and the footage of him was taken in 1896, when he was 86 years old.… pic.twitter.com/tJsDB7s7Qa

— Visegrád 24 (@visegrad24) May 8, 2025

Papa Leo XIII besohet të jetë personi më i hershëm dhe më i moshuar ndonjëherë që është filmuar pas shpikjes së kamerës. Ai lindi më 2 mars 1810 – në një kohë kur Evropa ishte ende në trazira nga luftërat napoleonike – dhe pamjet e tij u regjistruan në vitin 1896, kur ai ishte 86 vjeç. Këto pamje janë të një rëndësie të veçantë historike, jo vetëm për Kishën Katolike, por edhe për historinë e teknologjisë filmike dhe të dokumentimit vizual.

Filmi është xhiruar nga kameramani italian, Vittorio Calcina, i cili ishte përfaqësues i Lumière Brothers në Itali dhe një nga pionierët e parë të kinemasë në vend. Pamjet tregojnë Papën duke ecur ngadalë në kopshtet e Vatikanit, i shoqëruar nga disa figura të tjera kishtare.

Lexo po ashtu Çfarë dimë për emrin papnor Leo?

Edhe pse të shkurtra dhe të heshtura, këto sekonda filmike përbëjnë një dritare unike drejt së kaluarës, duke na lejuar të shohim me sytë tanë një figurë që përndryshe do ta njihnim vetëm nga portretet apo shkrimet historike.

Ky film konsiderohet si një nga regjistrimet më të hershme të një personi dhe ka një vlerë të jashtëzakonshme kulturore, teknologjike dhe shpirtërore. Ai lidh dy epoka: atë të një kishe që përballej me modernitetin dhe atë të një bote që sapo kishte nisur të arkivonte historinë me anë të imazhit të lëvizshëm. /Telegrafi/