Shtetet e Bashkuara janë të gatshme t’i japin municion aleatit të NATO-s, Turqisë, së bashku me ndihmën humanitare në veri-perëndim të Sirisë, ku Ankaraja është në një situatë gjithnjë e më të ndërlikuar me Rusinë, tha të martën përfaqësuesi special i SHBA-së për rajonin.

Sipas mediave të huaja, përcjell Telegrafi, duke iu drejtuar reporterëve në provincën kufitare të Hatay të Turqisë, James Jeffrey tha se Shtetet e Bashkuara do të sigurojnë që pajisjet e prodhuara nga SHBA të jenë gati për ushtrinë turke.

Ndërkohë, po sipas mediumit izraelit Haaretz, ambasadori amerikan në Turqi, David Satterfield, tha në të njëjtën informatë se Uashingtoni po shqyrton një kërkesë për mbrojtje ajrore.

Fjalët mbështetëse vijnë ndërsa luftimet intensifikohen përtej kufirit në rajonin e Sirisë, Idlib, ku Turqia dhe rebelët aleatë po luftojnë me forcat e qeverisë siriane të mbështetur nga Rusia.

Raportohet se gati një milion njerëz janë shpërngulur atje gjatë muajve të fundit.

“Ne jemi të gatshëm të sigurojmë (mbështetje) – për shembull presidenti (Trump) e përmendi këtë – municion”, citohet të ketë thënë Jeffrey, duke shtuar se homologët turq gjithashtu kishin “theksuar shumë nevojën për ndihmë humanitare”.

“Turqia është një aleat i NATO-s. Ne kemi një program shumë të madh të shitjeve ushtarake jashtë vendit, shumë nga ushtria turke përdor pajisjet amerikane”, tha ai. “Ne do të sigurohemi që pajisjet të jenë gati. Si partner të NATO-s ne ndajmë inteligjencën e informacionit… dhe ne do të sigurohemi që ata të kenë atë që u nevojiten atje”.

Ndryshe, të martën në Idlib, Turqia rrëzoi një aeroplan të qeverisë siriane dhe shkoi afër konfliktit të drejtpërdrejtë me Rusinë në betejën mbi hapësirën e fundit të Sirisë ende të mbajtur nga rebelët pas luftës nëntë vjeçare të këtij vendi.

Madje, Ankaraja ka kërkuar përdorimin e mbrojtjes tokë-ajër të SHBA-së, edhe pse vendosi të blinte alternativat e prodhuara ruse S-400 vitin e kaluar në një veprim që zemëroi Uashingtonin. /Telegrafi/