SHBA-ja vendos tarifa prej 25 për qind për të gjitha automjetet e huaja

Presidenti amerikan, Donald Trump, ka njoftuar se tarifat e reja tregtare të SHBA-së ndaj vendeve të tjera do të hyjnë në fuqi sonte, në mesnatë.

Gjatë një fjalimi në Shtëpinë e Bardhë, ai ka bërë të ditur se tarifat përfshijnë një taksë prej 25 për qind për të gjithë prodhuesit e huaj të automjeteve.

Sipas Trump, më shumë se 80 për qind e veturave të prodhuara në Kore të Jugut shiten brenda vendit, ndërsa mbi 90 për qind e automjeteve të shitura në Japoni janë të prodhimit vendas.

Ndërkohë, automobilat e prodhuara në SHBA përfaqësojnë vetëm një përqindje të vogël të tregjeve në këto vende, shkruan cnn.

Lexo po ashtu Trump nënshkruan urdhrin ekzekutiv për tarifa reciproke: SHBA-ja deri më tani ishte plaçkitur dhe dhunuar nga kombet e tjera

“Ford ka një prani shumë të vogël në tregjet ndërkombëtare,” ka theksuar ai, duke e cilësuar këtë si një disbalancë tregtare që ka dëmtuar rëndë industrinë amerikane.

“Për këtë arsye, duke filluar nga mesnata, do të vendosim një tarifë 25 për qind për të gjitha automjetet e prodhuara jashtë vendit”, ka deklaruar Trump.

Ndryshe, bursat amerikane u mbyllën lart, pasi tregtarët injoruan shqetësimet për pasigurinë dhe e shtynë tregun në territor pozitiv.

Indeksi Dow u mbyll me një rritje prej 235 pikësh, ose 0.56 për qind. Indeksi më i gjerë S&P 500 u rrit me 0.67 për qind, ndërsa Nasdaq Composite, i dominuar nga teknologjia, u rrit me 0.87 për qind. S&P 500 shënoi ditën e tretë radhazi me fitime. /Telegrafi/