SHBA dhe BE: Rusinë nuk do të lejojmë që energjinë ta kthejë në armë

Shtetet e Bashkuara dhe Bashkimi Evropian kanë premtuar se do të “kundërshtojnë drejtpërdrejt” të gjitha përpjekjet për të destabilizuar tregun global të energjisë dhe për ta kthyer energjinë në një armë.

“Të dy palët përsëritën angazhimin e tyre të fortë për të përballuar drejtpërdrejt, me masat e duhura, të gjitha përpjekjet për të destabilizuar situatën globale të energjisë dhe për të anashkaluar sanksionet”, shkuan në deklaratën e përbashkët të lëshuar pas takimit të Këshillit të Energjisë BE-SHBA në Bruksel.

“Përshpejtimi i tranzicionit të energjisë, reduktimi i varësisë nga lëndët djegëse fosile dhe reduktimi i konsumit të energjisë janë çelësi për forcimin e sigurisë energjetike dhe kundërshtimin e përpjekjeve për ta kthyer energjinë në një armë”, thuhet në deklaratën e përbashkët.

Ata diskutuan gjithashtu mënyrat për të forcuar sigurinë energjetike në Ukrainë dhe Moldavi, raporton cnn.

“Pas sinkronizimit të suksesshëm të Ukrainës dhe Moldavisë me rrjetin elektrik të BE-së, Këshilli synon të vazhdojë të mbështesë rimëkëmbjen dhe rindërtimin e shpejtë të Ukrainës dhe të mbështesë Ukrainën dhe Moldavinë duke ofruar ndihmë në tranzicionin e tyre afatgjatë ekonomik dhe kalimin në energji të pastër”, theksuan ata.

SHBA dhe BE u zotuan gjithashtu të vazhdojnë të koordinojnë përgjigjet dypalëshe dhe shumëpalëshe për të ruajtur stabilitetin e tregut global të energjisë. /Telegrafi/