SHBA dërgoi bombardues supersonikë në Japoni

Shtetet e Bashkuara të Amerikës kanë dërguar bombarduesit supersonikë B-1B në Japoni, një nga partnerët kryesorë aleatë në perëndim të Paqësorit, për të forcuar më tej stabilitetin në këtë rajon strategjik të ndjeshëm.

Japonia ndodhet brenda “shenjës së parë të ishujve”, që është pjesë e strategjisë detare amerikane për të kufizuar qasjen ushtarake të Rusisë dhe Kinës në Paqësor, raporton newsweek.

Po ashtu, në Japoni ndodhet numri më i madh i ushtarëve amerikanë jashtë SHBA-ve, që shërben si një mjet frikësimi kundër Koresë së Veriut të armatosur me armë bërthamore dhe kundër kundërshtarëve të tjerë të SHBA.

Bombarduesi B-1B, i njohur gjithashtu me nofkën Lancer, operon rregullisht në perëndim të Paqësorit, ku zhvillon demonstrata force me aleatët dhe partnerët amerikanë.

Të martën, dy bombardues B-1B morën pjesë në stërvitje me aeroplanët luftarakë të Koresë së Jugut mbi Gadishullin Korean.

Lancer mund të mbajë ngarkesën më të madhe konvencionale të luftarakëve amerikanë, deri në 34 mijë kilogramë bomba dhe raketa, sipas përshkrimit teknik zyrtar. Ka një arritshmëri ndërkontinentale dhe mund të fluturojë me shpejtësi deri në 1.2 Mach, më shpejt se zëri.

Kjo flotë aktualisht nuk është e pajisur për misione bërthamore, por shpërndarja e saj vjen pas një paraqitjeje të bombarduesve kinezë H-6N, të aftë për të mbajtur armë bërthamore, të cilët u vunë re në formacion para paradës ushtarake të paralajmëruar.

Komanda e Forcës Ajrore të SHBA për rajonin e Paqësorit njoftoi se dy bombardues B-1B kanë ateruar të martën në bazën ajrore Misawa në Japoni, nga ku arritën nga baza e tyre kryesore Dyess në Teksas. Ky ishte një mision i quajtur Bomber Task Force 25-2. /Telegrafi/