Seleni ndihmon në parandalimin e kancerit të zorrës së trashë

Studimi i ri, i publikuar në periodikun “International Journal of Cancer”, zbulon se rritja e konsumimit të selenit mund të ndihmojë në parandalimin e kancerit të zorrës së trashë.

Selenin nuk është e vështirë ta konsumoni përmes ushqimit, sepse atë e përmban një varg i ushqimeve, ndërsa më së shumti e gjejmë në guaska, arra braziliane, mish të kuq dhe zorrë.

Studiuesit kanë konstatuar se seleni e luan një rol të rëndësishëm në ruajtjen e shëndetit të organeve riprodhuese, rregullimin e hormoneve tiroide dhe sintezës së ADN-së.

Konsumi tepër i ulët i selenit është i lidhur me rritjen e rrezikut të problemeve kognitive, vdekjes së parakohshme dhe imunitetit të dobësuar.

Shkencëtarët nga Britania e Madhe e kanë kryer një studim në të cilin e kanë përcjellë lidhjen midis konsumimit të selenit dhe nivelit të rrezikut nga kanceri i zorrës së trashë. Studimi përfshiu më shumë se 520.000 njerëz nga 10 vende të ndryshme të Evropës Perëndimore.

Rezultatet e hulumtimit treguan se pjesëmarrësit të cilët kishin mungesë të selenit në trup, e kishin një rrezik më të lartë të zhvillimit të kancerit të zorrës së trashë, në krahasim me pjesëmarrësit me nivele të kënaqshme të selenit.

Ekspertët theksojnë se për shumicën e njerëzve, rekomandohet doza ditore e selenit prej 14-55 mikrogramësh në ditë. Do të konsumoni sasi të mjaftueshme të selenit në qoftë se ushqimi juaj është i balancuar dhe i shëndetshëm. Por në qoftë se nuk jeni të sigurt që jeni duke konsumuar sa duhet selen, gjithsesi konsultohuni me mjekun tuaj.

Hulumtuesit theksojnë se rezultatet e hulumtimit janë preliminare dhe se nevojitet të bëhet vlerësimi nga ekspertë të jashtëm. /Telegrafi/