Sela: Shqiptarët me platformën treguan veprim të burrështetasve të mëdhenjë

Profesori Universitar dhe njohësi i çështjeve politike, Ylber Sela, ka pohuar se partitë politike shqiptare në Maqedoni me hartimin e platformës apo deklaratës shqiptare kanë treguar vendosshmëri se nuk kanë ndërmend të zmbrapsen nga ideja e tyre për barazi të plotë të shqiptarëve në vend, njofton Telegrafi Maqedoni.

“Pas hartimit të kësaj marrëveshjes të partive politike shqiptare, me ndihmën edhe të Prishtinës dhe Tiranës zyrtare, disa herë e kam potencuar se ky është një vendim i burrështetasve të mëdhenj dhe të vendosur, të cilët nuk kanë ndërmend të tallen në politik, por ta marrin seriozisht barazinë e etnitetin shqiptarë me atë maqedonas. Prandaj tash kjo deklaratë e partive politike shqiptare do të jetë edhe një udhërrëfyes i rëndësishëm edhe për gjeneratat tjera të cilat do të vinë, të cilët nuk do të mund të shkelin mbi këtë platformë apo marrëveshje, sepse aty shkruan qartë se bartës i procesit duhet të jetë partia e parë tek shqiptarët e përkrahur nga të tjerat”, tha profesori Sela në një emision në gjuhën shqipe në TV Nova.

Ai po ashtu tregoj se BDI-ja me veprimin e saj për të mos qenë pjesë e qeverisë me OBRM-PDUKM-në treguan se nuk janë vasalë të tyre./Telegrafi/