Sekretari i EFJ-së i reagon Dimal Bashës: Sjellja jote e papërgjegjshme po e dëmton reputacionin e Kosovës

Ricardo Gutierrez, sekretar i përgjithshëm i Federatës Europiane të Gazetarëve (EFJ) ka shprehur shqetësimet e tij pas paraqitjes së deputetit të Lëvizjes Vetëvendosje, Dimal Basha në Radio Televizionin e Kosovës.

Në profilin e tij në Facebook, Gutierrez thotë se sjellja e deputetit është e papranueshme, derisa i ka bërë thirrje që të ndal sulmet edhe ndaj Asociacionit të Kosovës, transmeton Telegrafi.

“Zoti Basha, ju kërkoj të ndaloni intimidimin dhe përpjekjet për t’i diskredituar gazetarët dhe organizatën e gazetarëve. Mjaft është mjaft. Apo duhet të flas në gjuhën tuaj: BOLL MA. Kjo është thjesht e papranueshme në vendet demokratike”, ka shkruar ai.

Në reagimin e tij ai ka kërkuar nga kryeministri Albin Kurti, që të ndërmerr masa ndaj anëtarit të partisë së tij, duke shtuar se sjellja e Dimal Bashës është e papërgjegjshme dhe po e dëmton reputacionin e Kosovës.

Ditë më parë, Asociacioni i Gazetarëve të Kosovë reagoi ndaj deputetit Basha.

Në reagimin e AGK-së thuhet se deputeti Dimal Basha e ka krahasuar Transmetuesin Publik, RTK me televizionin shtetëror serb, RTS kur është pyetur nga gazetarja Blerta Foniqi Kabashi për kushtin e Asociacionit për anëtarësim e Kosovës, në Këshillin e Evropës.

“Për besë unë e shoh qysh e shoh secili shqiptar. Në RTS-in e Serbisë ata mujnë me pas shqetësim kryesor Asociacionin. Në RTK-në e Kosovës nuk duhet me kanë veç Asociacioni… A ta shpjegova që ka marrëveshje Kosova? Pse po e bën temë a duhet me ba Asociacionin a jo? Na e dimë çka është tema kryesore”, ka thënë Basha.

Lexo po ashtu AGK-ja dënon intimidimin publik të deputetit Dimal Basha ndaj gazetares së RTK-së

Pas kësaj, ka reaguar edhe deputeti Basha, i cili ka thënë se ai nuk ka intimidu gazetaren e RTK-së.

“Qenka shqetësu AGK dhe drejtorat e RTK-së, se kinse unë paskam intimidu gazetaren dhe se e kam sulmu AGK-në. E para, unë asnjëherë nuk e kam intimidu gazetaren. Unë jam përgjigj herën e parë për temën e asociacionit me shumë korrektësi, dhe kur më pyeti përsëri për asociacionin, i përgjigja se NUK do duhej që tek dialogu asociacioni të jetë prioritet dhe temë kryesore”, kishte deklaruar Basha në reagim./Telegrafi/