Salihaj: Qeveria urgjent të na njoftojë çfarë po ndodh në veri, çdo pritje mund të jetë me pasoja të rënda për Kosovën

Deputeti nga radhët e LDK-së, Adem Salihaj i ka bërë thirrje qeverisë që urgjentisht t’i informojë se çfarë po ndodh në veriun e Kosovës.

Salihaj përmes një postimi në Facebook, ka thënë se është nevojë urgjente thirrja e parlamentit,e Këshillit të Sigurisë dhe e një shtabi kombëtar të mbrojtjes,si dhe ndërmarrja e të gjitha veprimeve për mbrojtjen e shtetit të Kosovës.

Postimi i plotë:

Lajme shumë shqetësuese po vijnë këto ditë për ndërhyrje të Serbisë me qëllim të riokupimit të një pjese të Kosovës. Këto lajme i konfirmoi edhe vetë Hashim Thaçi në Bruksel, në cilësinë e presidentit të Kosovës. Mediat dhe portalet japin lloj-lloj informatash të paverifikuara se tashmë forca të organizuara e të armatosura serbe,duke përfshirë edhe gjandarmerine serbe tashmë kanë hyrë në veriun e Kosoves.
Qeveria deri më tash nuk ka dhënë informata lidhur me zhvillimet atje. Ajo duhet të na informojë urgjentisht se çka po ndodhë atje.
Është nevojë urgjente thirrja e parlamentit,e Këshillit të Sigurisë dhe e një shtabi kombëtar të mbrojtjes,si dhe ndermarrja e të gjitha veprimeve për mbrojtjen e shtetit të Kosovës.
Çdo minutë e pritjes mund të jetë me pasoja të rënda për shtetin e Kosovës dhe tërësinë territoriale të saj.(sic.) /Telegrafi/