Rusia ka humbur rreth gjysmën e tankeve – dhe ky nuk është problemi i vetëm i luftës së saj në Ukrainë

Ushtria ruse ka humbur të paktën gjysmën e tankeve të saj që kur filloi agresionin mbi Ukrainë, sipas një raporti nga një institut me bazë në Londër të publikuar të mërkurën.

“Flotat e tankeve dhe artilerisë ruse kanë pësuar dëmtime të konsiderueshme”, thuhet në raportin e publikuar nga Instituti Ndërkombëtar për Studime Strategjike, një organizatë kërkimore, shkruajnë mediat e huaja, përcjell Telegrafi.

Grupi vlerësoi se rreth gjysma e flotës së tankeve moderne të Moskës para luftës, duke përfshirë modelet T-72B3 dhe T-72B3M, janë shkatërruar.

Kështu, trupat ruse kanë përdorur nxjerrjen e pajisjeve të vjetra nga rezervat për të mbushur boshllëqet në fushën e betejës.

Raporti identifikoi 1700 humbje të tankeve ruse, por Henry Boyd, një studiues për analizat e mbrojtjes dhe ushtarake në institut, tha se ky numër mendohet të jetë edhe më i madh.

“Unë do të dyshoja se shifra aktuale është diku midis 20 dhe 40 për qind më e lartë se kaq”, ka thënë Boyd në një konferencë shtypi në lidhje me raportin.

Hulumtimi i tij tregon se midis 2,000 dhe 2,300 tanke ruse janë shkatërruar deri tani.

Flota më e vogël e Ukrainës ka humbur gjithashtu tanke të shumta beteje në luftime, thonë analistët, por këto humbje janë kompensuar disi nga tanket që ajo ka “kapur” nga forcat ruse, si dhe nga donacionet e tankeve të epokës sovjetike nga Polonia, Republika Çeke dhe aleatë të tjerë.

Boyd shtoi se dëmi që pësoi flota ruse u ngadalësua gjatë muajve të dimrit, por se “një ofensivë më e madhe potencialisht më vonë këtë vit” mund të rrisë shkallën e humbjeve.

Raporti identifikoi gjithashtu vështirësi të tjera të rusëve në fushën e betejës, duke përfshirë rezervistët e patrajnuar që thirreshin në vijën e frontit pa municion ose pajisje të duhura.

Për ushtrinë ruse, thuhet në raport, “lufta ka nxjerrë në pah probleme të kahershme që lidhen me komandimin dhe kontrollin si në nivelet më të reja ashtu edhe në ato më të larta komanduese, me mungesë fleksibiliteti që provon një dobësi të rëndësishme”.

Në të njëjtën kohë, Rusia dhe Ukraina po shterojnë rezervat e municioneve me një ritëm marramendës në luftën gati njëvjeçare, duke ushtruar presion mbi prodhuesit e armëve në mbarë botën për të përmbushur kërkesën dhe duke detyruar Moskën t’i drejtohet aleatëve si Irani për të rritur furnizimet. /Telegrafi/