Rusët nisën një seri sulmesh me raketa në agim

Rusia nisi një seri sulmesh me raketa dhe artileri në Ukrainë, në sulmin e dytë të agimit në tre ditë, raportoi BBC.

Një person u vra në rajonin Khersonit dhe 25 persona u plagosën në Dnipro, mes tyre tre fëmijë, transmeton Telegrafi.

Forcat e armatosura të Ukrainës njoftuan se mbrojtja ajrore ka rrëzuar 15 nga 18 raketat e lëshuara. Ndër objektivat kryesore ishte qyteti i Pavlohrad pranë Dnipro.

Një zyrtar i emëruar nga Rusia tha se burimet për ofensivën ukrainase ishin prekur.

Lexo po ashtu Instituti për Studimin e Luftës zbulon lëvizjet e Putinit që po shkaktojnë probleme më të mëdha për ushtrinë ruse

Raketat synonin infrastrukturën hekurudhore dhe depot e karburantit.

Janë dëmtuar 19 ndërtesa shumëkatëshe, 25 shtëpi private, gjashtë shkolla dhe kopshte dhe pesë dyqane.

Ushtria ukrainase ka kohë që flet për një kundërsulm të madh, por nuk ka specifikuar se ku dhe kur mund të nisë.

Pavlohrad është në territor nën kontrollin e Ukrainës, rreth 110 kilometra nga fronti.

Kreu i administratës ushtarake të qytetit të Kievit, Serhiy Popko, tha se raketat u rrëzuan gjithashtu në hapësirën ajrore të Kievit.

Lexo po ashtu Ukraina rrëzoi 15 raketa ruse, sulmi zgjati tre orë

Në rajonin Kherson, i cili ende kontrollohet pjesërisht nga Rusia, autoritetet rajonale ukrainase njoftuan se rusët kishin kryer 39 granatime.

Zyrtarët rusë thanë se katër persona u vranë dje në një fshat kufitar rus në një sulm ajror ukrainas.

Ndërkohë, një zyrtar ukrainas tha se ushtria kishte dëbuar forcat ruse nga disa pozicione në Bakhmut, një qytet lindor që ka qenë i rrethuar prej muajsh.

Gjenerali Oleksandr Sirski, komandanti i forcave tokësore, tha se situata ishte ende mjaft e vështirë, por se armiku nuk ishte në gjendje të merrte kontrollin e qytetit. /Telegrafi/