Rritet niveli i ujit në lumin Mirusha, rrezik për përmbytje të vendbanimeve përgjatë lumit (Foto)

Si rezultat i reshjeve të shumta gjatë ditëve të fundit, niveli i ujit në lumin Mirusha, është rritur dukshëm, por deri në këtë moment nuk janë shkaktuar përmbytje dhe as depërtime të ujit në shtëpi banimi.

Sipas një njoftimi të Komunës së Malishevës, në disa vende lumi ka dalë nga shtrati, por pa shkaktuar ndonjë rrezik për qytetarët.

Por sipas njoftimit, nëse vazhdojnë reshjet e shiut, pritet që fillimisht të bllokohet rruga Mirushë-Gurbardh, pjesa e urës mbi liqenin Mirusha, ku niveli i ujit është në nivel me rrugën, përkatësisht urën mbi liqe.

“Lumi Mirusha, ka dalë nga shtrati në hyrje të fshatit Banjë, por nuk janë shënuar dëme, ndërsa niveli i ujit është i rritur përgjatë tërë shtratit të lumit”, thuhet në njoftim.

Më tej bëhet e ditur se Drejtoria për Mbrojtje dhe Shpëtim, gjatë tërë ditës ka qenë në gatishmëri dhe në inspektim të vazhdueshëm të situatës.

Sipas kësaj drejtorie, nëse vazhdojnë reshjet e shiut, rrezik mbetet diga e liqenit në Mirushë, si dhe vendbanimet përgjatë lumit Mirusha, ku mund të ketë përmbytje eventuale.

“Drejtoria për Mbrojtje dhe Shpëtim, do të vazhdojë të vëzhgoj situatën pa ndërprerë. Në vëzhgim të situatës janë edhe Policia e Kosovës, duke i vëzhguar pikat që konsiderohen më problematike. Një nga faktorët e daljes nga shtrati të lumit, janë edhe mbeturinat që persona të pandërgjegjshëm i gjuajnë në lum ose përgjatë lumit”, përfundohet në njoftim. /Telegrafi/