​Rriten deri në 25 për qind çmimet e shitjes së banesave dhe qirave, sërish pritet të ketë shtrenjtim

Çmimet për shitjes së banesave në Kosovë por edhe çmimet e qirave janë rritur rreth 25 për qind, rritje kjo e cila pritet të vazhdojë.

Në Shoqatën e Ndërtimtareve të Kosovës dhe agjencitë e patundshmërisë, thonë se rritja e çmimeve të shitjes dhe qirave të banesave ka ndodhur për shkak të inflacionit dhe rritjes së materialeve ndërtimore. Ata madje theksojnë se kjo rritje e çmimeve të materialeve ndërtimore është pothuajse 100 për qind në krahasim me vitin 2020.

Burim Halili, zyrtar i njërës nga agjencive të patundshmërisë në kryeqytet, tha se ka rritje të çmimit të qirave dhe shitjes së banesave për 25 për qind.

Halili thekson se pritet të ketë sërish rritje të çmimeve, pasi materialet ndërtimore kanë ngritje të çmimeve.

“Sa i përket çmimit të qeras dhe të shitjes kemi ngritje. Realisht kohëve të fundit kemi ngritje të çmimeve pothuajse kudo, në të gjitha produktet, por në veçanti kemi tek shitja. Ajo që ka ndikuar shumë te ngritja e çmimeve në shitje, është sepse është rritur materiale ndërtuese sikur është armatura, betoni edhe gjitha tjerat. Afërsisht tek shitja është ngritur në çmim diku 20 për qind deri 25 për qind edhe të qiraja njëjtë, por kjo që ka ndikuar te shitja është rritja e materialeve”, tha Halili.

Sipas tij, në vazhdimësi pritet të ketë rritje sërish të çmimeve.

“Po pritet të këtë rritje për shkak se materialet ndërtimore kanë ngritje, në veçanti ka armature për 50 për qind, kështu që unë mendojë që jemi në atë procesin e ngritjes edhe mendoj që i duhet përafërsisht 5-6 muaj që të rrisin çmimin stabil në bazë të materialëve që i kenë, kemi objekte që janë ndërtuar më herët, ata kanë ende mundësi që të ofrojnë çmimeve të tregut që kanë pasur më herët. E në momentin kur shiten edhe ato banesa, atëherë ne kemi të bëjmë ndërtime që janë duke ndërtuar me materiale që janë të ngritën dhe ata mendojë që nuk do të kenë mundësi që të kenë tolerime në çmim”, shtoi ai.

Nga Shoqata e Ndërtimtareve të Kosovës thonë se rritja e materialeve ndërtimore është pothuajse 100 për qind në krahasim me vitin 2020. Rritjen e çmimit të qirave e ka arsyetuar edhe Faton Hoxha nga kjo shoqatë.

“Rritja e çmimit të banesave është si rezultat i rritjes së çmimeve të materialeve ndërtimore. Tre materialet bazë, hekuri, çimento dhe druri, rritja është pothuajse 100 për qind. Nëse krahasojmë me vitin 2020 ku nuk ka pas lëvizje të madhe të çmimeve. Ndërsa rritja e çmimeve të qirasë ndoshta mund ta arsyetojnë me inflacionin që po ndodhë”, tha Hoxha.

Ai ka kritikuar Qeverinë e Kosovës për menaxhimin e buxhetit. Sipas tij, kjo duhet të investojë në projektet që i ka planifikuar për këtë vit.

“Qeveria kish me qenë më se miri projektet e veta, ato që i ka planifikuar për vitin 2022 që janë projekte kapitale që janë në masë rreth 700 milionë euro e që i ka harxhuar vetëm 20 për qind të tyre, ndihmese e madhe kishte me qene kjo, ta investojë paranë, mjetet në qarkullim dhe jo t’i mbajë aty. Qeveria po krekoset se për vitin e ardhshëm është buxheti më i madh ndonjëherë, mirëpo duke shikuar numrat buxhetor këtë vit si është harxhuar buxheti këtë vit, mundet të ndërrojë çfarëdo shifre e buxhetit, por nëse vazhdon me këtë menaxhim të mjeteve, kot janë numrat”, kritikon ai.

Mjaftë të shqetësuar për rritjen e qirasë janë shprehur edhe qytetarët. Euron Hyseni, i cili është edhe qiradhënës, tha se kjo rritje e qirasë po i dëmton jashtëzakonisht shumë.

“Qiraja është më shtrenjtë se vitin e kaluar për rreth 15 për qind. Kjo na dëmton shumë duke krahasuar me rrogat e vogla që janë në vend”, tha Hyseni.

Edhe Xhavit Berisha është shprehur i shqetësuar më rritjen e çmimeve. Ai thekson se vendi është në krizë ekonomike dhe këto rritje të çmimeve nuk mund t’i përballojnë qytetarët.

“Është shumë keq për arsyeje se është krizë ekonomike, njerëzit nuk kanë para, pensionet dhe rrogat e vogla, kështu me rrit qiranë, nuk e di si mbesin gjallë ata njerëz. Ushqimi, barnat, shembull siç janë të pensionuarit, nuk iu mbetet asgjë tjetër veç të vdesin”, tha Berisha.

Bashkim Sylaj, banor në kryeqytet, tha se rritja e çmimeve është barrë e rëndë për qytetarët.

“Barrë e madhe është për ata që duhet paguar qiranë. Është çmim i lartë, sidomos për ata që nuk i kanë kushtet”, tha Sylaj. /KP/