Rrëshqitja e dheut bllokon rrugën në një prej vendpushimeve malore më të njohura të Zvicrës, nis evakuimi i turistëve me helikopter

Helikopterët kanë transportuar një sërë turistësh të bllokuar në majën e një prej vendpushimeve malore më të njohura të Zvicrës, pasi një rrëshqitje dheu ndërpreu qarkullimin në rrugë deri të paktën javën e ardhshme.

Ekipet nga shërbimi i shpëtimit dhe helikopterëve Air Zermatt drejtuan operacionin për atë që mediat zvicerane thanë se ishin rreth 2,200 turistë, kryesisht zviceranë, të bllokuar në resortin Saas Fee në rajonin jugor të Valais.

Autoritetet e Valais thanë se një rrebesh gjatë natës të së enjtes bëri që disa lumenj në luginën e Saas të shpërthenin nga brigjet e tyre midis qyteteve Stalden dhe Saas-Balen, shkruan euronews, përcjell Telegrafi.

Ata thanë se rruga ka të ngjarë të mbyllet të paktën deri në fillim të javës së ardhshme.

Të premten, transmetuesi publik RTS transmetoi imazhe të një vargu të gjatë njerëzish, disa të veshur me veshje ecjeje, duke pritur për helikopterët.

Bëhet e ditur se fluturimet, duke përdorur helikopterët Air Zermatt, duhej të miratoheshin nga Zyra Federale e Aviacionit Civil (FOCA).

Një zëdhënës i Air Zermatt tha se nuk ishte menjëherë në gjendje të vlerësonte se sa njerëz ishin evakuuar në operacion. /Telegrafi/