Restoranti “Noma” i Rene Rexhepit në Kopenhagë mbyllet vitin e ardhshëm – do të shndërrohet në një ‘laborator gastronomik’

Noma, një nga restorantet më të njohur në botë, do të mbyllë dyert për klientët vitin e ardhshëm.

Që nga hapja dy dekada më parë, restoranti i Kopenhagës – i njohur me shpikjen e Kuzhinës së Re Nordike – kryesoi listën e 50 restoranteve më të mira në botë pesë herë, më së fundi në vitin 2021, përcjell Telegrafi.

Por pas vitesh shërbimi të pjatave – sipërmarrja e shefit të kuzhinës së Rene Rexhepit me tre yje të Michelin do të ketë një mbyllje në fund të vitit 2024.

Kështu, siç shkruan CNN, vitin e ardhshëm do të rilindë si një “laborator gjigant gastronomik”, i quajtur Noma 3.0.

“(Do të jetë) një kuzhinë testuese pioniere e dedikuar punës së inovacionit të ushqimit dhe zhvillimit të shijeve të reja, e cila do të ndajë frytet e përpjekjeve tona më gjerësisht se kurrë më parë”, ka bërë të ditur restoranti në një deklaratë në faqen e tij të internetit.

“Qëllimi ynë është të krijojmë një organizatë të qëndrueshme të përkushtuar ndaj punës novatore në ushqim, por edhe të ripërcaktojmë themelet për një ekip restoranti, një vend ku mund të mësosh, të rrezikosh dhe të rritesh”, është thënë më tej.

Megjithatë, ish-restoranti do të mirëpresë ende mysafirë në shfaqjet e rastësishme ose gjatë sezonit.

Noma 3.0 ka qenë në fazën e planifikimit për dy vitet e fundit, një periudhë gjatë së cilës shumë në industri janë goditur rëndë.

“Nëse pandemia na ka mësuar diçka, është se sa të brishta mund të jenë ëndrrat tona, sa tepër rraskapitëse dhe e vështirë mund të jetë kjo industri”, kishte thënë Rexhepi pas marrjes së çmimit Restoranti më i mirë në botë në vitin 2021.

Duke lënë të kuptohet për ndryshimin e drejtimit të Noma-s në atë kohë, ai tha se ekipi kishte “kaluar një vit e gjysmë të fundit duke ëndërruar për diçka. Ne do të shkojmë ta ndërtojmë atë tani”. /Telegrafi/