Reagime nga PDK e OVL UÇK pas shkarkimit të Fadil Kodrës

Pas 12 vjetësh, Fadil Kodra nuk doli të premten në vendin e tij të punës.

Drejtori i Agjencisë për Menaxhimin e Emergjencave u shkarkua të enjten e 14 korrikut me vendim të ministrit të Punëve të Brendshme, Xhelal Sveçla.

Fadil Kodra ka shërbyer si udhëheqës i agjencisë që menaxhon me njësitë e zjarrfikësve që nga viti 2010, kur ishte emëruar në këtë pozitë nga Qeveria “Thaçi 1”.

Për shtatë vjet, Kodra shërbeu si Kryeshef Ekzekutiv i Agjencisë së Menaxhimit të Emergjencave, ndërkaq në pesë vitet e fundit ka ushtruar pozitën e Drejtorit të Përgjithshëm në këtë agjenci.

Por, para se të ngjitej në hierarkinë institucionale, Fadil Kodra është njohur për aktivitetin e tij në Ushtrinë Çlirimtare të Kosovë.

Fadil Kodra është pjesë e luftëtarëve të parë të UÇK-së.

Pas këij vendimi ka pasur reagime të ashpra nga PDK dhe OVL UÇK.

Deputetja e PDK-së, Ganimete Musliu përmes një postimi në Facebook ka shkruar se shkarkimi i Kodrës është përndjekje politike.

“Përndjekjet politike e rajonale me mentalitet të viteve të ‘90-ta, s’kanë të ndalur. Xhelal Sveçla, e paska shkarku sot Fadil Kodrën, i cili ka pasur pozitën e ushtruesit të detyrës së drejtorit të Agjencisë për Menaxhim të Emergjencave. Si duket veprimtaria kombëtare e z.Kodra e bënë të pa përshtatshëm për këtë Regjim”, ka shkruar Musliu.

Edhe nënkryetari i Skenderajt, Sami Lushtaku e ka konsideruar të gabuar shkarkimin e Kodrës.

Përmes një postimi në Faecebook, Lushtaku e ka quajtur të turpshëm shkarkimin e Kodrës nga ana e ministrit Sveçla.

“Duket që kjo qeveri e turpit ka aq shumë antipati ndaj UÇK-së, sa askush nuk mund të imagjinonte se veprimet e saj do të bien deri në këtë nivel. Nuk ka turp më të madh sesa të shkarkohet nga pozita e Drejtorit të Agjencinë e Emergjencave, një njeri si Fadil Kodra, që gjithë jetën e ka vënë në shërbim të kombit”, shkruan ndër të tjera ai.

Ndërsa reagim për këtë ngjarje ka bërë edhe kryetari i OVL UÇK-së, Faton Klinaku.

Klinaku këtë vendim të ministrit të Punëve të Brendshme, Xhelal Sveçla e ka quajtur turp.

“Shkarkimi nga pozita e Drejtorit të Përgjithshëm të Agjencisë së Emergjencave të Kosovës, i njërit nga themeluesit të UÇK-së, nga grupi i Komandantit Legjendar Adem Jashari, Gjenerali Fadil Kodra, është turpi i turpit të kësaj qeverie”, ka shkruar mes tjerash ai./Telegrafi/