Rasti i dhunimit të 11-vjeçares në Prishtinë, dënohen me 40 vjet burg katër të akuzuarit

Gjykata Themelore në Prishtinë i ka dënuar me 40 vjet burg katër të akzuarit, tre prej tyre të mitur, në rastin e dhunimit të 11-vjeçares në Prishtinë, në gusht të vitit 2022.

Sipas njoftimit, gjykata nuk ka gjetur që e dëmtuara të ketë qenë e trafikuar apo viktimë e veprës penale të trafikimit me njerëz.

I akuzuari E.R është shpallur fajtor për veprën penale “Dhunimi” dhe ndaj tij është shqiptuar dënim me burgim në kohëzgjatje prej 15 vjetëve, në të cilën llogaritet koha e kaluar në paraburgim.

I mituri XH.S është shpallur fajtor për veprën penale “Dhunimi” dhe për veprën penale “Keqpërdorim i Fëmijëve në Pornografi” si dhe është dënuar me dënim me burgim për të mitur në kohëzgjatje prej tetë viteve.

I mituri G.R është shpallur fajtor për veprat penale “Dhunimi”, “Keqpërdorim i Fëmijëve në Pornografi” dhe veprën penale “Ndihmë në kryerjen e veprës penale Dhunimi” si dhe është dënuar me dënim me burgim për të mitur në kohëzgjatje prej nëntë viteve.

I mituri G.J është shpallur fajtor për veprën penale “Dhunimi” dhe veprën penale “Keqpërdorimi i Fëmijëve në Pornografi” si dhe ndaj tij është shqiptuar dënim me burgim për të mitur në kohëzgjatje prej tetë viteve.

Ndërsa, i akuzuari SH.K është liruar për veprën penale “Shërbime seksuale të viktimës së trafikimit”.

“Vetura e përdorur dhe telefonat e përdorur janë konfiskuar, ndërsa pala e dëmtuar është udhëzuar në kontest të rregullt juridiko civil”, thuhet në njoftimin e gjykatës.

Lexo po ashtu Dosja e dhunimit të 11-vjeçares: Konfirmohet se vajza ishte edhe më herët viktimë

Rasti i dhunimit të 11-vjeçares u bë publik gushtin e vitit të kaluar. Autoritetet atëbotë thanë se ajo dyshohej se ishte përdhunuar në një park të Prishtinës.

Po ashtu, e mitura dyshohet se ka qenë cak i dhunës seksuale edhe në qershor të vitit 2022. Për ngjarjen e qershorit, autoritetet kanë ngritur aktakuzë ndaj tetë personave.
Në njoftimin e Gjykatës Themelore të Prishtinës më 24 shkurt nuk bëhet e ditur se për cilin rast është shqiptuar ky aktgjykim dënues.

Rasti i dhunimit të kësaj të miture nxiti reagime në mesin e shoqërisë në Kosovë, me ç’rast janë mbajtur protesta ku është kërkuar “dënim meritor” për të dyshuarit.

Në Kosovë, sipas të dhënave të Policisë së Kosovës, çdo vit raportohen dhjetëra raste të dhunës seksuale.

Rrjeti i Grave të Kosovës ka thënë se numri më i madh i viktimave të kësaj dhune janë vajzat e moshës 13 deri në 16 vjeç.

Kodi Penal i Kosovës parasheh dënime nga dy deri në 15 vjet burgim për dhunime e sulmet tjera seksuale. /Telegrafi/