Rasti i Boves në fushë vuri alarmin: Mjeku zbulon se një lojtar tjetër i Serie A ishte gjithashtu i “paaftë” për të luajtur

Ngjarja traumatike nga ndeshja mes Fiorentinës dhe Interit, kur futbollisti i ri Edoardo Bove pësoi një atak kardiak, ndezi alarmin në futbollin italian dhe tashmë mjeku i nderuar nga Italia, Ivo Pulcini, ka shprehur fjalë shqetësuese.

Fatmirësisht, italian i ri Bove u zgjua pas 13 orësh koma dhe ndihet mirë, pa rrezikuar jetën, por ai është ende nën vëzhgimin e mjekëve në spitalin e Firences.

Megjithatë, mjeku Ivo Pulcini, i cili ka qenë drejtor i ekipit mjekësor të Lazios për vite me radhë, doli publikisht me zbulimin tronditës se aktualisht në Serie A luan një futbollist ‘pa emër’, të cilin e deklaroi të paaftë për të luajtur futboll për shkak të gjendjes së tij shëndetësore.

“Në vitin 2019 pata një vizitë nga një futbollist shumë i rëndësishëm, i cili aktualisht është shumë i njohur dhe sot luan në Serie A. E deklarova të paaftë për të luajtur futboll dhe më pas ai vizitoi tre klinika të ndryshme sepse drejtori i atëhershëm i klubit Igli Tare donte për ta nënshkruar me çdo kusht. ‘Jo’-ja ime mbeti e patundur dhe ne nuk e nënshkruam atë”, ka thënë fillimisht Pulcini në një intervistë për Il Messaggero, duke shqetësuar kështu publikun e futbollit italian.

#Lazio dott. Ivo Pulcini: “Nel 2019 negai l’idoneità ad un noto giocatore di Serie A. #Bove? Nessuna crisi epilettica” https://t.co/mhZwAoPCBi pic.twitter.com/wEzWAuBP0a

— calciomercato.com (@cmdotcom) December 3, 2024

Pasi Bove u rrëzua në fushë, shoku i tij i skuadrës Danilo Cataldi ishte i pari që e ndihmoi. Ajo që është interesante është se doktor Pulcini ka punuar me Cataldin dhe e ka trajnuar për të dhënë ndihmën e parë, e cila mund t’i ketë shpëtuar jetën Bove.

“Lazio e mësoi atë të jepte ndihmën e parë. Cataldi ka një certifikatë ndërkombëtare të Shoqatës Amerikane të Zemrës (ACIS) për të ndihmuar njerëzit në çdo situatë urgjente. Lazio ishte klubi i parë në Itali që bëri kurse të ringjalljes kardio-pulmonare me përdorimin e një defibrilatori”, shpjegoi doktori.

“Ne në Lazio e filluam këtë praktikë në vitin 2018 dhe e përsërisim atë çdo dy vjet për të kujtuar teknikat dhe për të mësuar çdo të sapoardhur në klub. Presidenti Lotito bleu një pajisje kardiologjike të quajtur SDS, e cila parashikon vdekjen e papritur 10 vjet përpara. Ekipet duhet të punojnë për të siguruar se të gjithë e kanë këtë aparat”, ka përfunduar mjeku italian. /Telegrafi/