Raportimi i Bislimit në Komision, Kadiu: Mbledhja dështoi për shkak se nuk pati kuorum

Raportimi i zëvendëskryeministrit Besnik Bislimi në Komisionin për Integrime Evropiane ka dështuar të mbahet sot.

Sipas opozitës, mbledhja ka dështuar të mbahet për shkak se nuk ka qenë zëvendëskryeministri Besnik Bislimi, mirëpo këshilltari i Besnik Bislimit, Klisman Kadiu ka deklaruar se mbledhja ka dështuar për shkak të kuorumit.

Kadiu në Facebook ka shkruar se mbledhja ka dështuar të mbahet për shkak se nuk ka pasur kuorum, transmeton Telegrafi.

“Mbledhja e paraparë për raportim të zëvendëskryeministrit Bislimi para Komisionit Parlamentar për Integrim Evropian, nuk u mbajt për shkak se nuk pati kuorum. Jo sepse nuk shkoi zëvendëskryeministri Bislimi. Ai pikërisht nuk ishte prezent, sepse nuk kishte kuorum”, ka pohuar ai.

Tutje, ai ka shtuar se “zëvendëskryeministri Bislimi nuk ka refuzuar asnjëherë të raportojë në Komisionin për Integrim Evropian”.

Lexo po ashtu Bislimi nuk shkon për të raportuar në Komision, deputetët e PDK-së vendosin disa fotografi të tij duke hedhur shishe

Ndryshe, anëtarë të Komisionit për Integrim Evropian nga radhët e opozitës deklaruan sot se zëvendëskryeministri Bislimi nuk ka shkuar në raportim.

Kryetarja e Komisionit, Rrezarta Krasniqi që vjen nga radhët e Lidhjes Demokratike të Kosovës tha se zëvendëskryeministri Besnik Bislimi të enjten ka konfirmuar ardhjen në Komision dhe se ishte datë e caktuar vet nga zëvendëskryeministri.

“Sot e pamë që kjo mbledhje ka qenë e qëllimshme ku nuk ishin prezentë as deputetët e pozitës. Qëllimi i këtij takimi ka qenë të vijë zëvendëskryeministri dhe të na njoftojë lidhur me sanksionet e Bashkimit Evropian ndaj Kosovës sepse ne si komision ende nuk e kemi listën e projekteve….”, tha ajo. /Telegrafi/