Rama bën thirrje për zbardhjen e “21 janarit”, flet për dhunën në Kuvend: Nuk bashkëpunojmë me non-grata

Kryeministri i Shqipërisë Edi Rama mbajti këtë të premte një konferencë për media, ku nga ambientet e Kryeministrisë i bëri thirrje Prokurorisë së Posaçme SPAK që të zbardhë “21 janarin”.

Në fjalën e tij Rama u ndal dhe te dhuna në parlament, ku u pyet nëse mund të ketë një negociatë me ish-kryeministrin Sali Berishën për të normalizuar punimet e parlamentit.

Kreu i qeverisë theksoi se Partia Socialiste nuk bashkëpunon me persona non-grata dhe se nuk mbetet gjë tjetër veçse drejtësia të merret me personat që zbatojnë ushtrimin e detyrës së të tjerëve.

“Ne nuk negociojmë me non-gratën dhe me asnjë zëdhënës të non-gratës. Këtë e kemi thënë që ditën e parë dhe nuk është e re. Non-grata dhe ata që për një hall personal me drejtësinë e re kanë marrë përsipër të kthejnë parlamentin në një shesh për të bërë përshesh dhe i gëzohen faktit se ndezja e flakës në parlament merr dhenë nëpër botë, a thua se kjo sjell gjë tjetër përveç zhgaravitjes së imazhit të Shqipërisë.

Janë në të drejtën e tyre të bëjnë zgjedhjet e tyre, parlamenti ka rregullat dhe kufizimet e veta. Në kushtet kur rregullorja përjashton si masën më ekstreme të mundshme përjashtimin 10 ditë të një zjarrëvënësi ne nuk na mbetet gjë tjetër veçse që drejtësia të bëjë drejtësi mbi atë që pengojnë forcërisht ushtrimin e detyrës së të tjerëve. Nuk ka asgjë për t’u negociuar pasi nuk është e vërtetë se një numër i caktuar firmëtarësh iu teket të ngrenë një komision hetimor. Është qartësisht e kornizuar në ligj, se po të ishte Kushtetuese çdo nismë për të ngritur një komision, Gjykata Kushtetuese nuk do të shpallte anti-kushtetuese komisione të caktuara, siç ka ndodhur”, tha Rama.

Rama ka folur gjithashtu për “21 janarin”. Sipas tij Prokuroria e Tiranës është tallur me përbuzje me Kushtetutën, ligjin, dhimbjen dhe të drejtën e familjarëve të viktimave në radhë të parë, por dhe gjithë shoqërisë për të njohur deri në fund të vërtetën.

Rama tha se një provë e re që ka dalë para disa muajsh është trajtuar si leckë, ndaj ai shprehu besimin se drejtësia e re do të vepronte.

“Qysh se ky krim ka marrë rrugët e prokurorive dhe gjykatave të vendit ka ndryshuar struktura e sistemit të drejtësisë dhe personalitetet apo profilet e zyrtarëve të lartë hetohen nga një tjetër strukturë. Leximi i vendimit të gjykatës është si të lexosh një rrëfim të stërpërsëritur prej nesh në vite dhe vendosja e gishtit drejtpërdrejtë te autoritet ekzekutive të kohës është e shkruar e zeza mbi të bardhë.

Jo vetëm për krimin e vrasjes që ka mbetur pa autor, sepse vrasja nuk ka nisur nga tërheqja e këmbëzës së automatikut, por nga urdhri i cili ka ardhur nga maja, por nga ana tjetër gjykata vë gishtin dhe te krimi i pengimit të drejtësisë. Është e qartë se autoritetet ekzekutive më të larta të vendit kanë penguar në mënyrën më brutale dhe kriminale drejtësinë që të reagojë dhe veprojë në kohë reale për të nisur zbardhjen e këtij krimi.

Nuk ka asnjë forcë që mund të pengojë zbardhjen përfundimtare të krimit shtetëror të 21 janarit, por mundtë vazhdojë të vonohet dhe për këtë arsye jam këtu duke shprehur këto konsiderata sepse është jashtëzakonisht e rëndësishme për moralin e sistemit të drejtësisë, për moralin e reformës në drejtësi, për moralin e institucioneve të reja të drejtësisë që të mos vazhdojë kalvari i familjeve të viktimave,” u shpreh Rama. /Telegrafi/