QKUK konfirmon se ka humbur jetën një pacient në Klinikën e Psikiatrisë si pasojë e zjarrit – helmohen nga tymi edhe ekipi mjekësor

Qendra Klinike Universitare e Kosovës (QKUK), ka konfirmuar se mbrëmë si pasojë e një zjarri në njërën nga dhomat e Klinikës së Psikiatrisë, ka humbur jetën një pacient.

“Qendra Klinike Universitare e Kosovës njofton se mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore.

Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë  e ngulfatjes nga tymi (asfiksioni)  ai ka humbur jetën, përkundër përpjekjeve maksimale të stafit shëndetësor për ta shpëtuar pacientin”, thuhet në njoftim.

Lexo po ashtu Zjarr në Klinikën e Psikiatrisë në QKUK, dyshohet se një pacient ka humbur jetën

QKUK ka shtuar se gjithashtu gjatë kësaj kohe, një paciente tjetër ka pësuar shenja të helmimit nga tymi, e poashtu e tërë ekipi kujdestare, dy mjekë dhe dy infermiere të cilët  gjatë ofrimit të ndihmës për pacientin në fjalë dhe evakuimit të pacientëve të tjerë, kanë manifestuar shenja të helmimit nga tymi dhe kanë marrë ndihmë mjekësore në Klinikën Emergjente.

Rasti është duke u hetuar nga njësitet përkatëse të Policisë së Kosovës.

Ndërkaq nga Prokuroria Themelore e Prishtinës, kanë thënë për Telegrafin se prokurori ka urdhëruar që trupi i viktimës të dërgohet në IML për obduksion.

“Lidhur me rastin i cili ka ndodhur mbrëmë në Klinikën e Psikiatrisë të QKUK-së, ju njoftojmë se prokurori kujdestar nga Departamenti i Krimeve të Rënda është njoftuar  nga Policia e Kosovës për zjarrin e shkaktuar në rrethana të panjohura brenda kësaj Klinike, ashtu që nga ekipi mjekësor është konstatuar vdekja e një personi, derisa nga kjo situatë e krijuar disa persona të tjerë kanë marrë ndihmë mjekësore. Prokurori i Shtetit ka urdhëruar që viktima të dërgohet në IML, për t’iu nënshtruar obduksionit, derisa veprimet hetimore janë duke u ndërmarrë në koordinim me policinë, për t’i ndriçuar rrethanat e këtij rasti”, thuhet në përgjigjen e Prokurorisë. /Telegrafi/