Publikohen pamje të sulmit ndaj Valon Sylës

Gazetari Valon Syla u sulmua dje nga tre persona në një lokal në Bregun e Diellit në Prishtinë.

Në një video-incizim që ka siguruar Express, shihen disa persona teksa dalin jashtë, dhe po ashtu Valon Syla, teksa futet i gjakosur brenda restaurantit.

Ndërkaq, Syla ka treguar si ndodhi sulmi ndaj tij, gjatë ditës së martë.

“Unë kam qenë me Ilirin. E shihte në pasqyrë që dikush nga afër po mundohej të afrohej. Menduam se ishte Leo. Kur u afrova tek shkallët mu afrua një person, që mund ta identifikoj tani, por nuk e njoh. Ilir ishte duke parkuar kerrin. Aty brenda kanë qenë edhe disa gazetarë tjerë”, tregon ai.

Lexo po ashtu Arrestohen tre persona të dyshuar për sulmin fizik ndaj gazetarit Valon Syla

“Ishte një djalë i ri rreth të 30-ave. Më tha ‘a po vjen dej qetu’. Si ja pashë mjekrrën e dita që është fetar. Kishte mjekër dhe trenerka kështu dukej si shoumen. Edhe i dhunshëm. U mundova të vrapoj që të hapi derën dhe pastaj ata do largoheshin pari që mund të shihnin njerëz brenda dhe do frikësosheshin. Nuk u hap dera menjëherë. Pastaj më grushtuan. Edhe me pjesë metalike të orës. U mundova ta ruaj fytyrën. Ilir Mirena u ngut dhe largoi njërin, pastaj edhe tjerët dolën nga brenda. Ata ikën. Por mjaftoi që të më shkaktonin lëndime”, shtoi Syla.

Ai falënderon stafin mjekësor për trajtimin dhe sjelljen profesionale.

“Menjëherë e kam thirrë policinë. Ata ndihmën e shpejtë. Më dërguan në QKUK dhe pati reagim shumë të mirë dhe trajtim profesional”, përfundoi ai.

Ministri i brendshëm i Qeverisë së Kosovës, Xhelal Sveçla ka bërë të ditur se tre të dyshuarit për sulmin fizik ndaj gazetarit dhe analistit Valon Syla, janë arrestuar sot.