Prokuroria Themelore në Gjilan ngrit aktakuzë ndaj menaxherit të Taynës, Rinor Hykolli

Prokuroria Themelore në Gjilan ka ngritur aktakuzë ndaj menaxherit të reperes së njohur, Tayna, Rinor Hykolli.

Aktakuza është ngritur për veprën penale “Lëndim i rëndë trupor” për Rinor Hykolli dhe të pandehuri tjetër, Sh.Xh.

Menaxheri i Taynas gjendet nën masën e paraburgimit që nga 3 nëntori, dhe me rastin e aktakuzë është propozuar që t’i vazhdohet masa e paraburgimit.

Lexo po ashtu Të gjitha lajmet nga Rinor Hykolli

Njoftimi i plotë i Prokurorisë Themelore në Gjilan:

Prokuroria Themelore në Gjilan, ka ngritur aktakuzën kundër të pandehurve R.H. dhe Sh.Xh., për shkak të veprës penale ‘’Lëndimi i rëndë trupor”.

Sipas aktakuzës, i pandehuri R.H., më 22 Korrik 2021, rreth orës 00:40 minuta, në diskotekën Stop, në Gjilan, me dashje dhe me përdorimin e dhunës, për shkak të një mosmarrëveshje të mëhershme, i ka shkaktuar lëndime trupore të dëmtuarit L.B., duke e goditur me dorezë të revoles në pjesën e pasme të kokës, e më pas e ka goditur me grushte në kokë dhe pjesë të ndryshme të trupit, të cilit i ka shkaktuar lëndime të rënda trupore, për të cilat i njëjti ka kërkuar tretman mjekësor.

I pandehuri R.H., sipas kërkesës së prokurorisë gjendet nën masën e paraburgimit që nga data 03 Nëntor 2021 dhe me rastin e ngritjes së aktakuzës është propozuar që të njëjtit t’i vazhdohet masa e paraburgimit.

Ndërsa, i pandehuri Sh.Xh., me dashje ka ndihmuar në kryerjen e kësaj vepre penale, ashtu që me marrëveshje paraprake me të pandehurin R.H., e thërret të dëmtuarin L.B., duke e dërguar në vendin ku është kryer vepra penale. /Telegrafi/