Prokuroria nis hetimet për vdekjen e 67 vjeçares në Dragash, që dyshohet se ishte viktimë e dhunës në familje

Një 67 vjeçare është gjetur dje pa shenja jete në fshatin Kuk të Dragashit.

Policia bëri të ditur se dyshohet se ka pasur dhunë në familje.

Lidhur me këtë rast, Prokuroria e Prizrenit i ka thënë Telegrafit se ka nisur hetimet.

“Lidhur me rastin, prokurori kujdestar ka ndërmarrë veprimet e nevojshme hetimore, dhe ka urdhëruar që trupi i pajetë i viktimës me urgjencë të dërgohet për kryerje të obduksionit në Institutin e Mjekësisë Ligjore (IML) në Prishtinë, për të kuptuar shkakun e vdekjes”, thuhet në përgjigjen e Prokurorisë.

Prokuroria tutje ka shtuar se pas raportit të IML-së, dhe konstatimit të tyre do të veprohet më tutje.

“Po ashtu, prokurori ka autorizuar policinë për ndërmarrjen e veprimeve të tjera hetimore. Rrjedhimisht, rasti është nën hetime”, thuhet në përgjigje.

Zëdhënësi i policisë për rajonin e Prizrenit, Shaqir Bytyqi deklaroi dje se viktima kishte raportuar edhe më herët për dhunë në familje.

“Sot më datën 26. 12. 2022 në fshatin Kuk të Dragashit është raportuar për një grua 67-vjeçare të vdekur në shtëpinë e saj. Për shkak se e njëjta edhe më herët ka raportuar dhe është viktimë e dhunës, policia në konsultim me prokurorin kanë hapur rastin si vdekje e dyshimtë”, ka deklaruar Bytyqi.

Ndërkaq policia në raportin 24 orësh ka njoftuar vetëm se trupi i viktimës është dërguar në IML.

“Dragash 26.12.2022 – 05:00. Pas një informate të pranuar se viktima femër kosovare ka ndërruar jetë, njësiti përkatës kanë dal në vendin e ngjarjes dhe me vendim të prokurorit trupi i pa jetë është dërguar në IML për Obduksion”, thuhej në raport. /Telegrafi/