Policia refuzon kërkesën për faljen e namazit të xhumasë tek Ura e Ibrit

Përfaqësues të Bashkësisë Islame kanë kërkuar nga Policia e Kosovës në veri të Mitrovicës, që t’ju mundësohet sot falja e namazit të Xhumasë tek lokacioni i vjetër i xhamisë së Ibrit në këtë qytet, mirëpo një kërkesë e tillë është refuzuar.

Kështu ka bërë të ditur për Telegrafin kryetari i Bashkësisë Islame në Mitrovicë, Burim Veliu.

Sipas tij, Policia e Kosovës për rajonin e veriut nuk iu ka mundësuar kushte të favorshme të sigurisë për faljen e namazit të xhumasë, tek Ura e Ibrit.

Ndërsa në anën tjetër zëvendës drejtori i Policisë së Kosovës për rajonin e veriut të Kosovës, Besim Hoti, ka thënë për Telegrafin se tre individë të caktuar në mënyrë verbale kanë bërë një kërkesë të tillë, e cila kërkesë nuk është aprovuar për shkaqe të sigurisë.

“Pasi morëm një kërkesë verbale nga tre individë, ne lajmëruam Bashkësinë Islame për të cilën kërkesë ata nuk ishin të informuar. Ju treguam që për shkaqe dhe rrethana të sigurisë nuk mund të bëhet një gjë e tillë”, ka thënë Hoti për Telegrafin. /Telegrafi/