Policia konfiskon armë pa leje në Prishtinë dhe Lipjan

Policia e Kosovës gjatë 24 orëve të fundit në Prishtinë dhe Lipjan ka arrestuar pesë persona të dyshuar për armë mbajtje pa leje.

Po ashtu ka konfiskuar dy thika, një armë lodër, një automatik me katër fishekë, një pistoletë me dhjetë fishekë, një tytë e armës automatike dhe një revole.

Rastet e plota sipas raportit:

• Prishtinë 13.10.2020 – 01:30. Janë arrestuar dy të dyshuar meshkuj kosovarë, pasi që gjatë kontrollit, tek të njëjtit janë gjetur dhe janë konfiskuar dy thika dhe një armë lodër. Me vendim të prokurorit, të dyshuarit janë liruar në procedurë të rregullt.

• Prishtinë 13.10.2020 – 19:30. Janë shoqëruar në stacionin policor dy të dyshuar meshkuj kosovarë, pasi që gjatë kontrollimit të shtëpisë së tyre është gjetur dhe është konfiskuar një automatik me katër fishekë, një pistoletë me dhjetë fishekë dhe një tytë e armës automatike. Me vendim të prokurorit, palët janë liruar dhe rasti shkon në procedurë të rregullt.

• Lipjan 13.10.2020 – 22:20. Është shoqëruar në stacionin policor i dyshuari mashkull kosovar, pasi që tek i njëjti është gjetur dhe është konfiskuar një revole. Me vendim të prokurorit, i dyshuari është liruar dhe rasti shkon në procedurë të rregullt. /Telegrafi/