Policia me detaje të reja rreth aksionit kundër kontrabandës, nga tetë të arrestuarit tre janë liruar në procedurë të rregullt

Policia e Kosovës sërish ka dhënë detaje rreth aksionit të djeshëm kundër kontrabandës me mallra që u zhvillua në Prishtinë, Pejë, Mitrovicë Jugore dhe në veri të vendit.

Sipas raportit 24 orësh, policia ka njoftuar se  Drejtoria e Hetimit të Krimit  të Organizuar në bashkëpunim me Doganën e Kosovës, të asistuar nga njësi të ndryshme relevante policore, me urdhëresë lëshuar nga gjykatat kanë kontrolluar-bastisur në lokacionet e cekura me qëllim luftimin e kontrabandës.

Lexo po ashtu Gjuajtje me armë, gaz, granata e barrikada nga serbët - gjithçka që ndodhi gjatë aksionit të policisë në veri të Kosovës

“Gjatë operacionit në disa lokacione të ndryshme , shtëpi banimi dhe lokale të ndryshme janë gjetur  dhe sekuestruar:  mallra të ndryshme të cilat shërbejnë si prova materiale në vlerë prej qindra- mijëra €. Gjatë realizimit të operacionit në Mitrovicën veriore dhe Zveçan nga një grup protestuesish duke i  sulmuar dhe penguar në kryerje të detyrës kanë  bllokuar  rrugët me mjete transportuese, përdorë armë zjarri,  granata dore, bombola gazi, bomba shokuese e tjera,  me ç rast lëndime trupore kanë pësuar dhjetë zyrtar policorë, të cilët kanë pranuar trajtim mjekësor, ndërsa janë shkaktuar dëme materiale në disa automjete zyrtare”, thuhet në raport.

Në lidhje me rastin janë shoqëruar në polici tetë të dyshuar meshkuj të cilët pas intervistimit me vendim të prokurorit pesë  meshkuj kosovarë  janë  dërguar në mbajtje, ndërsa tre të tjerët janë liruar në procedurë të rregullt.

Dhjetë të  dyshuar të tjerë janë shpallur në kërkim. Rasti vazhdon të hetohet. /Telegrafi/