“Plastika po futet në ujin, ushqimin, madje edhe trupin tonë”: Brukseli në luftë kundër mbeturinave plastike

Komisioni Evropian të martën filloi një përpjekje për të pastruar oqeanet e mbytur nga plastika dhe deponitë e mbushura.

Sipas mediave të huaja, përcjell Telegrafi, strategjia e Plastikës është një përpjekje për t’i bërë kompanitë dhe konsumatorët të heqin varësinë nga plastika, me qëllim që të sigurojnë që të gjitha paketimet plastike të jenë të ripërdorshme ose të riciklueshme, deri në vitin 2030.

“Nëse ne nuk ndryshojmë mënyrën se si prodhojmë dhe përdorim plastikën, do të kemi më shumë plastikë sesa peshq në oqeanet tona deri në vitin 2050”, tha nënkryetari i parë i Komisionit, Frans Timmermans.

“Ne duhet të ndalojmë që plastika të futet në ujin tonë, ushqimin tonë, madje edhe trupin tonë”.

Nisma vë përballë Brukselin përpara një çështjeje të shqetësimit publik në rritje, duke e bërë ndoshta një fitore të lehtë politike.

Një qasje më e ashpër në plastikë mund të krijojë vende pune në riciklimin, inxhinieri dhe hulumtime, ka vlerësuar Komisioni.

Sipas mediave, strategjia është një grumbull i propozimeve legjislative, përditësime të qëllimeve ekzistuese dhe masave të tjera që ende duhet të dakordohen me Parlamentin dhe Këshillin.

Evropa prodhon rreth 26 milionë tonë plastikë në vit, por vetëm rreth 30 për qind e tyre riciklohen. Pjesa tjetër është kryesisht e djegur ose e hedhur në deponitë.

Komisioni vlerëson humbjen ekonomike në 100 miliardë euro në vit vetëm për paketimin e plastikës.

“Dikush duhet të jetë i interesuar për këto para”, tha nënkryetari i Komisionit Jyrki Katainen.

Siç thuhet më tej, strategjia përfshin kërkesa të reja për të dizajnuar produkte që janë të riciklueshme dhe standardet e cilësisë në mbarë BE-në për mbetjet plastike, të cilat më pas mund të mbyllen më lehtë në zinxhirin e prodhimit.

Ai gjithashtu do të inkurajojë prodhuesit që të përdorin sa më shumë materiale të ricikluara të jetë e mundur.

E për të ndihmuar, Brukseli do të shpenzojë 100 milionë euro në vit për riciklimin dhe riciklimin e plastikës. /Telegrafi/