Petrol Company bën me shtëpi të re familjen Bajrami në Fushë-Kosovë, punëson edhe kryefamiljarin (Video)

Përmes kampanjës humanitare “Nga një cent për çdo litër, gëzojmë 8-të familje”, Petrol Company ka bërë sot me shtëpi të re familjen dhjetë antarëshe të Besim Bajramit në Fushë Kosovë.

Dorëzimin e çelësave të shtëpisë së re tek kryefamiljari Besim Bajrami, e bëri drejtori i “Petrol Company”, Shkelzen Jusaj.

“Kjo shtëpi po dhurohet nga kompania bashkë me klientët e saj, sepse qytetarët kanë kontribuar në ndërtimin e saj, që ta bëjmë këtë gjest humanitar”, deklaroi Jusaj.

Kryefamiljari Besim Bajrami, u shpreh i lumtur që në muaj të Ramazanit po bëhet me shtëpi.

“Sot po bëhet ëndrra ime realitet në këtë muaj të Ramazanit, shpresoj të bëhen edhe shumë familje tjera me shtëpi, faleminderit prej të gjithëve që kanë kontribuar”, ka thënë Bajrami.

Përveç shtëpisë së re, Besim Bajramit iu dorëzua edhe kontrata e punës nga drejtori i Petrol Company, i cili tha se nga data 1 qershor ai do të fillojë edhe punën në kompaninë e tij.

I pranishëm në ceremoninë e ndarjes së çelësave të shtëpisë ishte edhe kryetari i Fushë Kosovës, Burim Berisha. Ai ftoi të gjithë kompanitë dhe bizneset që të dalin në ndihmë të familjeve në nevojë.

“Është kënaqësi që një familjeje të varfër t’ia mundësojmë të jetojë në një shtëpi të re, këtë e ka mundësuar kompania Petrol Company, e cila ka qenë e suksesshme Besoj që do të vazhdojë edhe me tutje të bëjë shtëpi tjera. Kemi probleme të ndryshme që si Komunë nuk po mundem t’i zgjidhim, mirëpo me kompanitë, me ndihmën e bizneseve do t’iu ndihmojmë. Ne e gjetëm Petrol Company, e gjetëm familjen Bajramin dhe e bëmë me shtëpi të re”, ka thënë kryetari Berisha.

Kampanja humanitare “Nga një cent për çdo litër, gëzojmë 8-të familje”, e Petrol Company, do të vazhdojë deri në ndërtimin e shtëpive tjera. /Telegrafi/