PDK vija të kuqe LVV-së, Çitaku: Preferojmë koalicion me partitë opozitare

Partia Demokratike e Kosovës (PDK) ka mbajtur mbledhjen e parë të Kryesisë pas zgjedhjeve të 9 shkurtit, ku është analizuar performanca zgjedhore, angazhimi i strukturave dhe janë diskutuar hapat e ardhshëm politikë.

Në një konferencë për media, Sekretarja e Përgjithshme e PDK-së, Vlora Çitaku, ka shprehur mirënjohjen e saj për mbi 200 mijë qytetarët që e votuan PDK-në, duke theksuar se ky është rezultati më i mirë i partisë që nga viti 2014.

“Ky rezultat dëshmon rikthimin e besimit të qytetarëve dhe rritjen e fuqishme të PDK-së. Nuk e shohim këtë sukses si një përmbyllje, por si një fillim të ri,” deklaroi Çitaku.

Ajo falënderoi kandidatin e PDK-së për Kryeministër, Bedri Hamzën, dhe Kryetarin e partisë, Memli Krasniqin, për një fushatë të ndërtuar mbi programin për një Kosovë më të mirë. Gjithashtu, ajo shprehu mirënjohjen për të gjithë kandidatët, anëtarët, aktivistët dhe votuesit e PDK-së.

Duke folur për opsionet e qeverisjes, Çitaku e përjashtoi mundësinë e një koalicioni me Lëvizjen Vetëvendosje, duke theksuar se PDK-ja preferon një bashkëpunim me partitë opozitare.

“PDK është e gatshme që, me kandidatin tonë për Kryeministër, Bedri Hamzën, të marrë përgjegjësinë për qeverisjen dhe të çojë Kosovën përpara. Megjithatë, procesi kushtetues duhet të përmbyllet me numërimin e plotë të votave dhe legjitimimin e deputetëve, pas së cilës do të nisin bisedimet për një koalicion të mundshëm,” shtoi ajo.

Çitaku siguroi qytetarët se çdo vendim politik do të merret nga organet e partisë dhe do të jetë transparent për publikun.

Në këtë kontekst, ajo i bëri thirrje Komisionit Qendror të Zgjedhjeve që të garantojë një proces të drejtë dhe të saktë të numërimit të votave, duke ruajtur integritetin e zgjedhjeve dhe respektuar vullnetin e qytetarëve.

“PDK do të mbetet zëri i qytetarëve, do të mbrojë interesat e tyre dhe do të punojë për një të ardhme më të mirë për Kosovën,” përfundoi Çitaku./Telegrafi/