Pasuria e saj është në vlerë prej 80 milionë dollarësh, por Aretha Franklin nuk ka lënë testament

Aretha Franklin, e cila ndërroi jetë në moshë 76-vjeçare, nuk ka lënë testament, ndërsa pasuria e saj është në vlerë prej 80 milionë dollarësh (69 milionë euro) dhe pritet të ndahet ndërmjet katër djemve të këngëtares.

Sipas AP, avokati i saj e kishte bindur këngëtaren që ta bënte testamentin para vdekjes, mirëpo ajo nuk kishte arritur ta shkruajë, prandaj në bazë të ligjit të Michiganit, katër djemtë e saj do ta ndajnë në mënyrë të barabartë pasurinë.

Mirëpo, duke qenë se Aretha ka lënë prapa vetes shumë gjëra që duhet të kryhen, duke përfshirë edhe autoritetet tatimore, avokatët dhe anëtarët e familjes, pritet që procesi i ndarjes së pasurisë ta zgjasë vite.

Lexo po ashtu Lajmet për Aretha Franklin

“Asnjëherë nuk më ka thënë se nuk do ta bëjë (ta shkruajë testamentin). Më duket se thjesht nuk ka arritur, nuk ka pasur kohë për të”, citon Thehollywoodunlocked.com fjalët e avokatit të saj.

Sipas ligjit në fuqi në Michigan, të katër pasardhësit e saj do të trashëgojnë në mënyrë të barabartë gjithçka që Aretha ka poseduar.

Por, meqenëse nuk janë në pyetje vetëm paratë, por edhe patundshmëria dhe përfitimet nga të drejtat e këngëve, shumëkush mendon se ndarja e pasurisë nuk do të jetë e lehtë.

Ndërsa menjëherë pas vdekjes së Franklin, zyra të ndryshme i kanë kontaktuar djemtë e saj për t’ua ofruar shërbimet e tyre. /Telegrafi/