Pandemia COVID-19 godet rëndë ekonominë ruse

Pandemia COVID-19 në njërën anë dhe rënia e kërkesës dhe çmimeve të naftës e gazit rus në anën tjetër, kanë goditur rëndë ekonominë ruse.

Projeksionet për këtë vit janë që Produkti i Brendshëm Bruto në Rusi pritet të bie me rreth 6.6 për qind.

Bizneset ruse gjatë karantinës kanë pësuar humbje prej rreth 52 miliardë dollar. Industritë më të goditura janë prodhimi dhe tregtim i makinave, transporti, turizmi, prodhimi i naftës dhe gazit.

Humbjet në industrinë e naftës dhe gazit kanë shkuar deri në 44 për qind, çka pritet të ketë ndikim direkt në buxhetin rus, kur dihet se nafta dhe gazi marrin pjesë me rreth 52 për qind në eksportet e gjithëmbarshme ruse.

Si pasojë e rënies së ekonomisë në Rusi, Dhoma e Tregtisë dhe Industrisë ka përllogaritur që deri në fund të vitit në Rusi, do të mbyllen rreth 1 milionë biznese të vogla dhe të mesme, çka është rreth 15-25 për qind e gjithë tregut në Rusi. Nga falimentimi i këtyre bizneseve, kontingjentit të papunëve pritet t’i shtohen edhe rreth 2.5 milionë të papunë.

Ish-zëvendës kryeministri rus, Arkady Dvorkoviq, i cili tani drejton Fondacionin Skolkovo, thotë që më e keqja për ekonominë ruse ende nuk ka ardhur.

Lexo po ashtu E goditur nga kriza e coronavirusit, Rusia po konsideron shkurtimet e shpenzimeve ushtarake

Deri sa Evropa ka filluar ta kaloj krizën ekonomike, Rusia vetëm se ka filluar të hyjë në zonën ku do të vërehen pasojat e krizës, të shkaktuara nga pandemia dhe rënia e kërkesës dhe çmimeve të naftës e gazit.

Rënia ekonomike në Rusi pritet të pasqyrohet në vitet që vijnë, pasi që fillimi i zbatimi të projekteve të mëdha infrastrukturore në Rusi, të paraqitura me pompozitet nga presidenti Putin, pritet që të shtyhen deri në gjashtë vite.

Shtyrja e projekteve të mëdha infrastrukturore do të ndikoj edhe më shumë në rënien e mbështetjes së rusëve për Putin, e cila edhe ashtu është në piken më të ulët historike. /RTK/