Osmani kujton të rënët në Rakoc e Kaçanik: Sakrifica e tyre, testament historie për rrugën deri te liria

Presidentja e Kosovës, Vjosa Osmani ka kujtuar të rënët e Rakocit dhe Lagjes së Re në Kaçanik.

Osmani përmes një postimi në Facebook, ka shkruar se sakrifica e tyre është testament historie për rrugën deri te liria.

“Sot i kujtojmë me nder e respekt gjithë ato gra e burra, të cilët janë shtyllë e fuqishme e lirisë, pavarësisë dhe e shtetit tonë”, ka shkruar Osmani.

Postimi i plotë:

22-vjet më parë, forcat e regjimit gjenocidal serb ia mësynë Rakocit dhe Lagjes së Re në Kaçanik. Në Betejën e 9 prillit të vitit 1999 për mbrojtjen e pragut të shtëpisë ranë 28 dëshmore e dëshmorë dhe 32 martirë.

Pjesëtarë të Brigadës 162 “Agim Bajrami”, të UÇK-së, e deshën lirinë dhe u flijuan për të. Sakrifica e tyre është testament historie për rrugën deri te liria.

Sot i kujtojmë me nder e respekt gjithë ato gra e burra, të cilët janë shtyllë e fuqishme e lirisë, pavarësisë dhe e shtetit tonë.

Përveç tjerash, Beteja e 9 Prillit dëshmoi edhe për guximin dhe kontributin e grave për lirinë e vendit. Në altarin e lirisë, këtë ditë ranë: Lumnije Raka, Jehona Raka, Emsale Frangu, dhe Mukadeze Muhaxheri-Lika.

Qoftë i përjetshëm kujtimi për dëshmoret, dëshmorët e martirët! /Telegrafi/