Osmani: Kryetarët në katër komunat veriore të marrin mandatin brenda afatit ligjor dhe të fillojnë punën

Presidentja e Kosovës, Vjosa Osmani në një deklarim për media ka thënë kryetarët e zgjedhur në katër komunat veriore duhet të marrin mandatin brenda afatit ligjor.

Osmani ka deklaruar se zgjedhjet në katër komunat veriore janë mbajtur pas dorëheqjes së ish kryetarëve, transmeton Telegrafi.

“Siç e dini zgjedhjet janë mbajtur për shkak se Kushtetuta jonë dhe legjislacioni në fuqi kërkon që të mbahen zgjedhjet sa herë që një kryetar komune jep dorëheqje. Ajo që e ka krijuar këtë situatë ka qenë dorëheqja e ish kryetarëve të komunave veriore.

Në këtë situatë ne kemi pasur obligime kushtetuese dhe ligjore dhe institucionet e sigurisë kanë bërë çmos që dita e zgjedhjeve të shkojë pa asnjë problem. Bojkoti i qytetarëve serb atje nuk ka qenë vullnetar ka qenë bojkot i detyruar i cili është nxitur nga Vuçiqi në Serbi dhe është zbatuar nga strukturat e tij ilegale dhe kriminale në veri të Kosovës, të cilët vazhdimisht kanë frikësuar, shantazhur dhe kërcënuar qytetarët serb në veri”, u shpreh ajo.

Presidentja shtoi se “tash jemi në një situatë ku përkundër përqindjes së vogël ligji nuk kërkon ndonjë përqindje të caktuar të pjesëmarrjes. Dhe kryetarët dhe të gjithë të zgjedhurit kanë detyrim që brenda afateve ligjore ta bëjnë betimin dhe të fillojnë punën e tyre”.

Lexo po ashtu Atiq: Do të punojë për të gjithë qytetarët pa dallim dhe pa diskriminim

“Çka është me rëndësi është që të gjithë kryetarët të punojnë me qytetarët që banojnë në këto katër komuna dhe t’i bindin që të gjitha projektet janë në të mirë të tyre, shërbimet administrative janë në të mirë të tyre, siguria është në të mirë të tyre. Projektet ekonomike i fuqizojnë ata, pra secili veprim është për të mirën e qytetarëve dhe jo të kundërtën, dhe ne presim që të gjitha këto procedura të shkojnë pa ndonjë problem dhe pa ndonjë tension”, tha ndër tjera ajo.

Ndryshe, sot Erden Atiq ka marrë detyrën si kryetar i Mitrovicës së Veriut. Atiq pas betimit u zotua se do të punojë për të mirën e gjithë qytetarëve, pa dallim dhe pa diskriminim. /Telegrafi/