OKB ngre alarmin: 14,000 foshnje mund të vdesin në Gaza në 48 orët e ardhshme pa ndihmë

Shefi humanitar i OKB-së, Tom Fletcher, ka folur për programin Today të Radio 4 të BBC-së në lidhje me sasinë e mjerueshme të ndihmës që Izraeli po lejon në Gaza.

Presioni ndërkombëtar për shkak të një krize buke që po afron e detyroi kryeministrin izraelit, Benjamin Netanyahu të njoftonte të dielën në mbrëmje se do të lehtësonte bllokadën shkatërruese 11-javore të ndihmës për të parandaluar një “krizë urie” në Gaza – por vetëm në një nivel minimal.

Fletcher tha se pesë kamionë me ndihma shkuan në Gaza dje, por e përshkroi këtë si një “pikë uji në oqean” dhe krejtësisht të pamjaftueshme për nevojat e popullsisë, shkruajnë mediat e huaja, përcjell Telegrafi.

Ai theksoi se kamionët e ndihmës, të cilët përmbajnë ushqim për foshnje dhe lëndë ushqyese, janë teknikisht në Gaza, por nuk kanë arritur tek civilët pasi janë vetëm në anën tjetër të kufirit.

Në këtë drejtim, Fletcher paralajmëroi se 14,000 foshnje mund të vdesin në 48 orë nëse ndihma nuk arrin tek ato në kohë.

“Dua të shpëtoj sa më shumë që të jetë e mundur këto 14,000 foshnje në 48 orët e ardhshme”, i tha ai BBC-së.

I pyetur se si arriti OKB-ja në këtë shifër, ai u përgjigj: “Ne kemi ekipe të forta në terren – dhe sigurisht shumë prej tyre janë vrarë… ne ende kemi shumë njerëz në terren – ata janë në qendrat mjekësore, janë në shkolla… duke u përpjekur të vlerësojnë nevojat”. /Telegrafi/