Nuk qëndroi në lojë për të gjuajtur penallti ndaj Portugalisë, Mbappe tregon se pse u zëvendësua

Kylian Mbappe ishte “shumë i lodhur” për të përfunduar ndeshjen në fitoren e Francës në çerekfinalen e Euro 2024 kundër Portugalisë, ndërsa sulmuesi shpjegoi pse u zëvendësua.

Mbappe luajti 90 minuta të plota, ndërsa Franca dhe Portugalia luajtën barazim pa gola për ta çuar ndeshjen në vazhdime. Pasi vazhdoi në pjesën e parë të vazhdimeve, ai nuk doli në 15 minutat e fundit, ku Bradley Barcola zuri vendin e tij.

Duke mos ekzekutuar penallti në gjuajtjen vendimtare, Mbappe u ndal para gazetarëve dhe foli për momentin e zëvendësimit.

“Në fund të kohës së rregullt, ne kishim folur tashmë me trajnerin. Ne vendosëm t’i jepnim një shtytje, në pjesën e parë [të vazhdimeve]. Unë i thashë se nuk po mundem më, isha shumë i lodhur”.

“Gjithmonë kam thënë para garave se çfarëdo që të ndodhë, e rëndësishme është që ne të fitojmë dhe ja ku jemi, unë shënova vetëm një gol, por jemi në gjysmëfinale. Jam ende shumë i lumtur”, deklaroi kapiteni i gjelave.

Lexo po ashtu "Të gjithë e dinë admirimin që kam për të, por dua ta eliminoj nga Euro 2024" - Mbappe mesazh Ronaldos para ndeshjes

Pavarësisht mungesës së Mbappes, skuadra e tij mposhti Portugalinë në penallti, me të pesë lojtarët e Francës – përfshirë edhe Barcolan – që shënuan, ndërsa Joao Felix humbi të tijën për Portugalinë.

Mbappe do të rikthehet në 11-shen fillestare kur skuadra e Didier Deschamps të takohet me Spanjën në gjysmëfinale të kompeticionit më 9 korrik. /Telegrafi/