Një prodhues norvegjez i armëve nuk mund të përmbushë kërkesat sepse një qendër e të dhënave e TikTok po “ha” të gjithë energjinë elektrike

Një prodhues norvegjez i armëve tha se një qendër e të dhënave TikTok po shpenzon të gjithë energjinë elektrike në rajon, që do të thotë se kompania nuk mund të vazhdojë përballimin në rritje globale për municion.

Siç shkruan Business Insider, përcjell Telegrafi, ekspertët po komentojnë gjithnjë e më shumë kërkesat masive të kompanive të mëdha të teknologjisë dhe sesi përdorimi i energjisë nga qendrat e tyre të të dhënave po shkakton probleme për industritë e tjera.

“Ne jemi të shqetësuar sepse shohim se rritja jonë e ardhshme sfidohet nga ruajtja e videove”, ka thënë Morten Brandtzæg, CEO i Nammo, në një intervistë me Financial Times.

Brandtzæg tha se kërkesa për predha artilerie ishte 15 herë më e lartë se normalja – një prirje e nxitur nga lufta në Ukrainë, e cila ka shfaqur përdorim të rëndë të artilerisë.

Ukraina, për shembull, do të donte të rriste përdorimin e saj ditor të predhave nga 6,000 në 65,000, shtoi ai.

Business Insider shkruan se nuk mundi të përcaktojë menjëherë nëse predhat e Nammo po përdoren në Ukrainë.

Pavarësisht këtyre, në zonën e Norvegjisë ku operon Nammo, puna e saj nuk ka përparësi ndaj çdo përdoruesi tjetër të energjisë elektrike.

Elvia, ofruesi i energjisë në rajonin Raufoss të Norvegjisë – një zonë rreth 120 km në veri të Oslos, i ka thënë FT se nuk ka kapacitet rezervë që Nammo të rrisë prodhimin e saj siç i është premtuar tashmë TikTok.

Një zëdhënës i tha FT se nëse Nammo bën kërkesë për më shumë kapacitet, do të “duhet kohë” përpara se të arrihet kjo, sepse rrjeti duhet “të forcohet”.

Veç tjerash, Brandtzæg tha se ai kishte shqyrtuar nëse ishte një rastësi që TikTok në pronësi kineze po pengonte zgjerimin e një kompanie armësh.

“Nuk do të përjashtoj që jo rastësisht ky aktivitet është pranë një kompanie mbrojtëse”, citohet të ketë thënë ai. “Nuk mund ta përjashtoj”.

Ndryshe, TikTok dhe gjigantë të tjerë të teknologjisë janë përballur me kritika për përdorimin e tyre të energjisë.

Në korrik, një raport nga FT zbuloi se përdorimi i energjisë elektrike nga kompanitë e mëdha – duke përfshirë Microsoft, Oracle, LG, Huawei, Amazon dhe Dell – po e bënte më të vështirë ndërtimin e më shumë shtëpive në Londër.

Për shkak të mbarimit të kapacitetit të rrjetit elektrik, raporti thoshte se kryeqyteti mund të përballet me ndalimin e projekteve të reja të banesave deri në vitin 2035.

Gjithashtu një raport i mëparshëm i vitit 2019 nga EirGrid, operatori i rrjetit elektrik të Irlandës, gjeti përfundime të ngjashme për Irlandën, e cila është një bazë popullore për qendrat evropiane të të dhënave të kompanive globale.

Ai zbuloi se qendrat e të dhënave shpesh mund të kërkojnë “të njëjtën sasi energjie si një qytet i madh” dhe mund të përbëjnë “29% të kërkesës për energji elektrike në Irlandë deri në vitin 2028”.

Ndërkohë vë në pah BI, prania e TikTok në Norvegji nuk ka gjasa të “zvogëlohet”.

Vendi ka një tepricë të energjisë së rinovueshme – kryesisht hidrocentrale – dhe është një destinacion popullor për qendrat e të dhënave për shkak të temperaturave të ftohta që reduktojnë kërkesën për të përdorur energjinë për të ftohur kompjuterët.

Në anën tjetër, TikTok gjithashtu ka plane për të ndërtuar atë që thotë se do të jetë kampusi më i madh i qendrës së të dhënave në Norvegji deri në nëntor të vitit 2023. /Telegrafi/