Një marrëdhënie që mund të ndryshojë rendin global – gazetat shkruajnë për rolin e SHBA-së në luftën Rusi-Ukrainë

Konferenca e sigurisë e këtij viti në Mynih ekspozoi hendekun në vlerat thelbësore që ndajnë administratën Trump nga shumica e evropianëve dhe ndezi alarm të thellë në përpjekjet e SHBA-së për të kontrolluar procesin e paqes në Ukrainë dhe për të përjashtuar qeveritë evropiane nga ai.

The Guardian ka listuar disa nga artikujt e gazetave kryesore evropiane dhe amerikane. Ja çfarë thanë ato:

Le Monde

Nëpërmjet JD Vance, zëvendëspresidentit të saj, SHBA i ka “shpallur luftë ideologjike Evropës”, shkroi Sylvie Kauffmann për gazetën franceze.

Nëse Vladimir Putin ia ktheu SHBA-së në një fjalim të famshëm të vitit 2007 në konferencë, në vitin 2025 ishin SHBA-të që ia kthenin Evropës.

Vance tha se kërcënimi më i madh për kontinentin nuk ishte Rusia apo Kina, por tërheqja e vetë Europës nga disa prej “vlerave më themelore” të saj.

Më keq, heshtja e tij relative mbi “temën për të cilën Evropa dëshironte më shumë ta dëgjonte”, pushtimi i përgjithshëm i Rusisë në Ukrainë, “zgjat moskuptimin dhe konfuzionin mbi iniciativën e Trumpit që synon t’i japë fund luftës”, sipas Kauffmann.

“Një mjegull e dendur tani rrethon synimet e Uashingtonit; mes deklaratave publike të Vance dhe Sekretarit amerikan të Mbrojtjes, Pete Hegseth, dhe intervistave të ndryshme të ndjekura me mohime, qëndrimet kontradiktore janë shumëfishuar”, tha ajo.

New York Times 

Administrata e SHBA-së nuk kishte bërë asgjë më pak se “ofrimi i asaj që mund të jetë një pamje paraprake nën Trumpin për një ripërcaktim të një marrëdhënieje transatlantike të ndërtuar mbi lidhjet e stabilitetit të pasluftës midis qeverive aleate”, tha gazeta.

Gjithashtu u kujtoi lexuesve fjalimin e Putinit të vitit 2007, në të cilin presidenti rus “kërkoi kthimin e ndikimit amerikan dhe një ekuilibër të ri të pushtetit në Evropë më të përshtatshëm për Moskën”, duke shtuar se ai “nuk mori atë që donte – atëherë”.

Tani, zyrtarët e lartë të Trumpit “e kishin bërë të qartë një gjë: Putini ka gjetur një administratë amerikane që mund ta ndihmojë atë të realizojë ëndrrën e tij”.

Komentet ngjallën frikën se SHBA-ja tani mund të “lidhet me Rusinë dhe ose të sulmojë Evropën ose ta braktisë atë fare”.

Një ndryshim i tillë, tha gazeta, do të përbënte “një fitore të paimagjinueshme dhe shumë më të rëndësishme për Putinin se çdo objektiv në Ukrainë”.

Süddeutsche Zeitung

Komentatori Daniel Brössler tha në Süddeutsche Zeitung se Vance nuk kishte ardhur në qytetin gjerman për të dhënë “një thirrje miqësore zgjimi”, por si “një zjarrvënës”.

Misioni i zëvendëspresidentit amerikan ishte “triumfi i populizmit të djathtë – me mbështetjen e shefit miliarder të Amerikës, Elon Musk”.

Heshtja e tij për politikën e sigurisë ishte sepse “puna tashmë ka filluar për një marrëveshje me Putinin në kurriz të Ukrainës, por edhe të Evropës. Kjo është shumë e qartë: Trump do ta bëjë marrëveshjen dhe evropianët do të duhet të paguajnë dhe të sigurojnë paqen ushtarakisht”.

Evropa, tha Brössler, po sulmohej “nga Putini, i cili i është afruar shumë qëllimit të tij për të rishikuar rendin evropian ditët e fundit.

Dhe nga Trump, i cili nuk njeh më as interesa të përbashkëta – dhe sigurisht jo vlera të përbashkëta.”

Nga njëra anë, SHBA-ja “po kërkon që Evropa më në fund të bëhet e aftë të mbrohet kundër Rusisë.

Nga ana tjetër, ajo po mbështet përkrahësit e Putinit”, nga kryeministri i Hungarisë, Viktor Orbán, te bashkëudhëheqësja e Alternative für Deutschland, Alice Weidel.

Kontinenti, tha ai, “do të duhet të ngrihet mbi vetveten”.

Kyiv Independent

“Administrata amerikane është e gatshme t’i japë Rusisë një fitore në luftën e saj brutale kundër Ukrainës. Ky është i vetmi përfundim që mund të nxjerrim”, tha gazeta.

Por, shtoi se ndërsa SHBA mund të jetë “aleati më i madh dhe më i pasur që ka Ukraina”, është larg nga i vetmi.

“Kjo do të thotë që të gjithë sytë janë te ju, Evropë. Vendimi i vërtetë nëse Rusia e fiton luftën, në fakt nuk i takon Trumpit tani – është me Evropën”.

Udhëheqësit e Evropës, nëse janë “udhëheqës të vërtetë të kombeve të tyre dhe jo oportunistë politikë, duhet të njohin urgjencën e situatës dhe të veprojnë tani.

Në fund të fundit, “nëse SHBA-ja është jashtë dhe Ukraina bie, Evropa do të lihet të përballet me Rusinë kokë më kokë”.

Rusia, tha gazeta, “nuk është në luftë me Ukrainën, është në luftë me Perëndimin”.

“Por ne e kuptojmë se çdo kompromis me Rusinë nuk do të jetë fundi i luftës. Nuk mund të ketë një kompromis në këtë luftë. Rusia fiton – Perëndimi humbet. Perëndimi fiton – Rusia humbet. Evropë, koha është tani.” /Telegrafi/