Pikat e kalimit kufitar me Serbinë, Jarinjë dhe Bërnjak vazhdojnë të jenë ende të mbyllura, edhe një javë pas sulmit terrorist që ndodhi në veri ndaj Policisë së Kosovës.
Kështu bëhet e ditur në faqen e Qendrës Kombëtare për Menaxhim Kufitar, e cila vepron në kuadër të Ministrisë së Punëve të Brendshme.
Këto dy pika u mbyllen pasi grupe të armatosura serbe hynë në Kosovë duke sulmuar Policinë me armë zjarri, transmeton Telegrafi.
Rreshteri Afrim Bunjaku u vra gjatë detyrës zyrtare rreth orës 03:00 të 24 shtatorit.
Pas vrasjes së policit, rreth 30 persona të armatosur rëndë dhe të maskuar u fshehën në Manastirin e fshatit Banjska të Zveçanit, për të vazhduar sërish me sulmet ndaj Policisë së Kosovës.
Nga gjuajtjet me armë zjarri u vranë edhe tre sulmues serbë. Sulmi terrorist ndaj Policisë së Kosovës u dënua fuqishëm nga ndërkombëtarët. /Telegrafi/
