Ngritja e çmimit të tatimit në pronë, opozita kritikon Qeverinë: Shpërfillje për qytetarët

Lidhja Demokratike e Kosovës (LDK) dhe Partia Demokratike e Kosovës (PDK), kanë reaguar pasi Ministria e Financave ka ngritur çmimin e tatimit në pronë.

Dhjetëra qytetarë kanë raportuar në rrjetet sociale se Komuna e Prishtinës ka rritur për 75 – 100 për qind tatimin në pronë. Përmes një njoftimi publik, nga komuna kanë thënë se një gjë e tillë është bërë me vendim të Ministrisë së Financave.

Avdullah Hoti nga LDK-ja ka pyetur se si arsyetohet kjo “në krizën më të madhe të çmimeve në 15 vitet e fundit?”.

“Qeveritarët e nisin vitin mbarë!!! I dyfishojnë faturat e tatimit në pronë, në veçanti për zonat urbane. Si arsyetohet kjo në krizën më të madhe të çmimeve në 15 vitet e fundit?!”, ka shkruar ai në Facebook.

Tutje, Hoti ka thënë se 85 mijë të punësuar nuk e dinë sa do ta kenë pagën në shkurt, por e dinë se faturat e tatimit në pronë i kanë të dyfishuara.

“Ligji sigurisht se kërkon ri-vlerësim të rregullt të vlerës së tregut të pronave. Por, ri-vlerësimi bëhet në kontekst të zhvillimeve ekonomike dhe sociale në vend, si dhe analizohet me kujdes se kur është koha e përshtatshme që kjo të reflektohet në faturat për qytetarët”.

Ndërsa, koordinatori i Departamentit për Financa në Kabinetin për Qeverisje të Mirë në PDK, Arben Mustafa, ka thënë se dyfishimi i tatimit në pronë do të ju rëndojë edhe më tej gjendjen qytetarëve.

“Në kohën kur qytetarët e Kosovës po ballafaqohen me një goditje shumë të rëndë të standardit të jetesës si rrjedhojë e rritjes së çmimeve, Qeveria e Kosovës paska vendosur ta dyfishojë tatimin në pronë për shumë qytetarë, duke ua rënduar edhe me tej gjendjen veç se të rënduar ekonomike”, ka shkruar ai në Facebook.

Sipas tij, kjo politikë e Qeverisë për t’i ngarkuar qytetarët me tatime më të larta në këtë kohë krize është vështirë e kuptueshme dhe “flet më së miri për kapacitetet e dobëta qeverisëse e shpërfilljen që kjo Qeveri po i bën vështirësive me të cilat po ballafaqohen qytetarët”.

“Me politika si kjo, Qeveria e Kosovës po dëshmon se është duke jetuar e shkëputur nga realiteti i zymtë ekonomik që po mbretëron në Kosovë!”, ka përfunduar Mustafa. /Telegrafi/