Nga seanca e grushteve, ndikimi i Dejona Mihalit në LVV e deri te qeverisja Kurti – si i sheh të gjitha këto deputetja e PDK-së?

Deputetja e Partisë Demokratike të Kosovës (PDK), Ganimete Musliu në një intervistë për Telegrafin ka folur për ngjarjet në seancën e 13 korrikut ku pati përleshje fizike, situatën aktuale politike, ndikimin e Dejona Mihalit tek deputetët e LVV e qeverisjen Kurti.

Musliu në intervistën për “Përballje” me kryeredaktorin Muhamet Hajrullahu, ka thënë se në histori të Kuvendit nuk mbahet mend kur qeveria grushton deputetët.

“Është e vërtetë që nuk mbahet mend në historinë e Kuvendit të Kosovës por mund të them ndoshta edhe në parlamentet demokratike, kur qeveria grushton deputetët. Në seancën e 13 korrikut e kemi një precedent të rrezikshëm ku zëvendëskryeministri Besnik Bislimi grushton deputetët në mënyrën më makabre të mundshme”, ka thënë Musliu.

Ajo më tej shton se mllefi që shihet në fytyrën e Bislimit gjatë goditjes që i bënë me shishe deputetit Mergim Lushtaku, “tregon saktë dhe qartë se deri në çfarë niveli ka arritur arroganca dhe dhuna e Qeverisë”.

Musliu thekson se dhunë ka pasur edhe më herët në parlament, ku përmend rastin e përleshjes mes Rexhep Selimit dhe Bekim Haxhiut vite më parë. Deputetja përmend edhe rastin e hedhjes së gazit lotsjellës nga deputetët e Lëvizjes Vetëvendosje gjatë kohës kur ishin në opozitë.

Deputetja Musliu ka hedhur poshtë pretendimet se e gjithë ajo që ndodhi në seancën e 13 korrikut kishte qenë një organizim paraprak nga deputetët e PDK-së.

“Në fillim të seancës kemi vendosur një pankartë që shkruante “Zdravo”, njërën në foltore e tjetrën para ulëses së kryeministrit dhe gjithçka ka qenë heshtje. Në momentin kur unë e kam vendosur fotografinë e Albin Kurtit, e cila e përshkruan më së miri Kurtin dhe gënjeshtrat e tij atëherë për të tregu besnikëri ndaj liderit, qohet zëvendëskryeministri që e luan rolin e truprojës dhe e shqyen fotografinë.

Unë isha nis drejt foltores me vendos fotografinë tjetër sepse kisha rezervë, dhe kur e kam parë Mërgimin tek foltorja duke i spërkat me ujë, për mua ka qenë e papritur dhe kjo tregon se ka qenë e pa organizuar. Nuk më dhanë afat me vendos fotografinë tjetër, sepse sulmi kriminal i zëvendëskryeministrit Besnik Bislimi atëherë e ka nxit edhe reagimin e deputetëve të partisë tonë”, tha Musliu.

Madje sipas saj, deputeti Mërgim Lushtaku në tërë atë kaos që ishte shkaktuar e kishte mbrojtur ministren e Drejtësisë Albulena Haxhiu.

“I pari që e nxiti krejt këtë situatë ishte Besnik Bislimi, pastaj kur kthehet Mërgim Lushtaku me ju përgjigj Bislimit në reagimin e tij, hidhet Hekurani dhe Albulena Haxhiu. Më vjen shumë mirë nga gjesti i Mërgim Lushtakut në gjithë atë tension që e ka pas në mënyrën sesi e mbron Albulenën nga turma e Vetëvendosjes”, tha Musliu.

Deputetja e PDK-së ka folur edhe për ndikimin e Dejona Mihalit te deputetët e LVV.

Musliu mes tjerash ka thënë se Dejona Mihali është instrument përmes së cilës kryeministri Albin Kurti “e shtrin diktaturën në institucionet e Kosovës”.

“Dejona Mihali është një e punësuar nga Albin Kurti. Nuk e di nga kush e si paguhet, por qeverisë me shtetin e Kosovës. Ia ka jep Albin Kurti këtë kompetencë. Është ajo e cila komplet deputetët e Lëvizjes Vetëvendosje i ka në kontroll”.

“Deputeti i LVV-së e merr nga Dejona Mihali komandën se çka duhet me votu e çka jo. Nuk do të thotë se ky është qëndrimi i Dejona Mihalit, ky është qëndrim i Albin Kurtit. Ai e ka instaluar atë si instrument”, ka deklaruar deputetja opozitare.

Tutje, ajo ka thënë se tendenca e militantëve të LVV-së për ta shkëputur Dejona Mihalin nga Albin Kurti është e rrezikshme.

“Në momentin kur deputeti që i ka marrë 70 mijë vota nga qytetarët nuk guxon me pas qëndrim për asnjë çështje, por e pret mesazhin nga Dejona Mihali është më shumë se fuqi”, është shprehur Musliu.

Sa i përket mundësisë për mbajtjen e zgjedhjeve të përgjithshme në shtator, ajo ka thënë se një gjë të tillë po e kërkojnë edhe qytetarët jo vetëm opozita.

Deputetja e Partisë Demokratike të Kosovës (PDK), Ganimete Musliu po ashtu ka folur për Qeverisjen Kurti.

Sipas saj, Qeveria Kurti njihet si qeveri e skandalit, korrupsionit dhe mashtrimit.

“Kur thash skandal, është qeveria e cila për tri vite kalon nga skandali në skandal. Një qeveri e cila ka ardhur me dhunë në pushtet tenton me dhunë ta mbajë pushtetin duke iu referuar asaj që biseduam më herët, sepse ministrat e Kurtit që janë skandal në vete në çdo seancë kanë provokuar deputetët dhe janë munduar që t’ia ndalin fjalën. Kemi rastin kur ministrja e Drejtësisë, Albulena Haxhiu i thotë deputetit ty duhet me t’a ndal fjalën me ligj”, tha Musliu.

Deputetja më tej si skandal tjetër përmend aferën e Martin Berishaj, Nagip Krasniqit, vajit, e autostradës për Gjilan.

Deputetja theksoi se “Albin Kurti është duke e humbur edhe trenin për tu treguar institucionalist, për ta dëshmuar veten”.

Sipas Musliut zyrtarët e Vetëvendosjes në institucione kanë punësuar militantë për të shantazhuar e kërcënuar punëtorët e administratës.

“Këta i kanë punës militantët nëpër kabinete që detyrë parësore nga ora 08:00 deri në orën 16:00 e kanë me i kërcënu punëtoret e administratës, e me i shantazhu.  Albin Kurti i ka mashtruar qytetarët e Kosovës në çdo fjalë”, u shpreh ajo. /Telegrafi/