Ryan Gravenberch, dikur i quajtur “Frank Rijkaard-i i ri” në akademinë e Ajax-it, po kalon një fazë të shkëlqyer karriere nën drejtimin e Arne Slot te Liverpooli.
Pas një sezoni të vështirë në Bayern Munich dhe një starti të ngadaltë në Anfield me Jurgen Klopp, mesfushori holandez po kthehet në një nga lojtarët më të rëndësishëm të skuadrës.
Pritshmëritë e larta dhe krahasimet me legjendën Rijkaard kishin krijuar presion të madh për Gravenberch.
Megjithatë, ardhja e Slot si trajner dhe dështimi i transferimit të Martin Zubimendit bënë që trajneri të vendoste t’i besonte Gravenberchit në një rol kyç në mesfushën e Liverpoolit, duke e kthyer atë në një element të pazëvendësueshëm të ekipit.
Ndryshe nga sezoni i kaluar ku luante kryesisht në rolin mbrojtës të mesfushës, këtë sezon ai ka marrë më shumë liri në pjesën e avancuar të fushës.
Kjo ka rezultuar në dy gola në vetëm katër paraqitje dhe një kontribut të madh në pesë fitoret e Liverpoolit në ligë.
Statistikat e këtij sezoni tregojnë një përmirësim të dukshëm në aspektin ofensiv, ndërsa roli mbrojtës mbetet po aq i fortë sa më parë.
Gravenberch ka qenë më aktiv në krijimin e rasteve dhe në goditjet në portë, duke ndryshuar mënyrën se si ai kontribuon në lojën e skuadrës.
Ish-mesfushori i Liverpoolit, Danny Murphy, e përshkruan Gravenberch si “lojtarin më të rëndësishëm dhe më të mirë të sezonit” për skuadrën, duke theksuar kombinimin unik të ndërgjegjësimit hapësinor dhe aftësisë për të dribluar kundërshtarët.
Në një sezon ku Liverpool synon të rikthehet në majat e futbollit evropian, kontributi i Gravenberchit ka qenë thelbësor.
Ai ka kaluar nga një talent premtues në një nga lojtarët kryesorë të skuadrës, duke dëshmuar se është gati të bëhet ylli që të gjithë prisnin. /Telegrafi/
