Nga Anglia në Tropojë me vrap për 40 ditë, shqiptari: Kam shpenzuar 130 mijë funte

Seb Ponari, një i ri shqiptar me banim në Angli, ka folur në lidhje me sfidën e jashtëzakonshme të tij.

Ai është nisur për të përshkuar me vrap një distancë prej 2,750 kilometrash nga Cambridge, Angli, drejt Tropojës në Shqipëri, brenda vetëm 40 ditësh.

Sfida e tij ka nisur më 10 maj dhe aktualisht ndodhet në Kroaci, ndërkohë që edhe pak ditë e ndajnë nga mbërritja në Shqipëri.

Sebi jeton prej 16 vitesh në Angli ndërsa duke folur për iniciativën e tij, tha se kjo gjë deri tani ka kushtuar rreth 130 mijë paund, ku vetëm ruloti që ka blerë ka kushtuar 43 mijë paund.

Paralelisht, ndërsa vrapon, ai thotë se shoqërohet edhe nga një staf në përbërje të së cilit janë shofer, fizioterapist dhe trajner ndërsa theksoi se vrapon rreth 10-11 gjatë 24-orëshit.

“Këtë vrap ia dedikoj babait tim, i cili ka ndërruar jetë 10 vjet më parë, dhe po udhëtoj nga shtëpia ime në Angli, te varri i babait në Tropojë. Unë bëj 70 kilometra në ditë dhe planik është që për 40 ditë në total që nga nisja të mbërrij në tropojë”.

“Stafi që më shoqëron janë tre persona: një shofer për rulotin, i cili është edhe fizioterapist shqiptar, trajneri i vrapit është nga Qiproja, ndërsa Toni dhe Landi janë nga Shqipëria”, tha Ponari në Euronews Albania.

Ai shton se ka marrë me vete 15 palë atlete për këto 40 ditë, ndërsa përveç rulotit kryesor, ka edhe një furgon dhe një rulot tjetër.

Kjo iniciativë unike e shqiptarit nuk ka si qëllim vetëm tejkalimin e kufijve të durimit njerëzor, por është edhe një thirrje për ndërgjegjësim dhe mbështetje për shëndetin mendor, për t’iu dhënë forcë të gjithë atyre që vuajnë nga problemet e shëndetit mendor, duke u thënë se çdo gjë është e mundur për t’u përmirësuar.